陈华鑫入行七年宣布离巢TVB：主力凑女做亲子KOL

最近TVB艺人一个接一个相继离巢，有人心灰意冷离开，亦有人转换跑道重新出发。参加2012年港姐入行嘅陈华鑫（Gloria），凭住无辜清纯样及甜美笑容，被宅男捧为最靓学生妹，但恐怕会成为绝响啦，因为佢9月尾已经静悄悄离巢。佢接受《香港01》访问时透露：“依家希望全心全意去照顾BB先。”

陈华鑫子宫颈短瞓床至36周 顺产诞6磅几囡囡：生完面对另一问题

近期离巢艺人众多，Gloria呢个时候离开，外间少不免有唔同揣测，佢接受访问时就话：“自己系约满离开，公司有打嚟问不如减啲SHOW继续签好唔好，我就话希望全心全意去照顾BB先。凑女真系好忙好忙，刚生完都有拍啲关于BB嘅节目，但自己觉得有啲兼顾唔到，唔想是但一样嘢做得唔好，宁愿不如先专心照顾囡囡先。”

喺2016年播出的《性在有情》中，Gloria饰演女主角陈敏之嘅妹妹，里面嘅学生造型喺网上疯传令佢荣升女神。佢亦透露离巢嘅心情：“唔舍得当然有，始终都做咗七年。最想多谢就系《性在有情》入面做我家姐嘅陈敏之，呢套戏系我入行以来最多戏份嘅剧集，佢真系教咗我好多嘢。最难忘拍《幕后玩家》，因为成个剧组上下都好开心，大家好夹到依家都成日约出嚟见面聚会。”

Gloria 2018年与圈外男友低调结婚后，去年底诞下囡囡Maddie，依家更加转做全职妈妈。不过Gloria亦一早铺路转型，喺网上同大家见面：“之后会主力凑女做亲子KOL，暂时都系接网上JOB比较多，依家不停钻研BB嘢，觉得好似将兴趣发展成事业，满足感好大“（收入方面同TVB工作时相比呢）其实收入比TVB时期收入仲多，最重要系时间相当弹性，自己可以打理好屋企大小事，再抽时间写嘢分享。”