Aka、Cheronna@Super Girls旧患缠身　坚持下月参加10公里慈善赛

Super Girls成员Aka（赵慧珊）和Cheronna（吴嘉熙）除了经常在台上劲歌热舞外，亦是运动狂热份子，周不时在社交网站分享健身片段，大晒完美身段，令人叹为观止。最近二人正进行密集训练，准备于11月参加由Unicef联合国儿童基金举办的“为儿童跑”10公里赛事，为全球抗爱滋工作进行慈善筹款。
撰文：赵允琳
摄影：叶志明

二人之前已有多次参加10公里赛事的经验，再加上平时已经有做gym及跑步习惯，所以今次的准备亦相对地轻松。今年初参加过渣马10公里的Cheronna表示在九月份开始加勤训练，一星期练跑两至三次，而其余日子则会做gym，集中强化肌肉及体能的训练。

Aka年初因身患筋膜炎而无奈缺席渣马，她笑言现时已无大碍：“已经好咗好多喇，所以依家跑步净系膝头会痛，如果我无其他剧烈活动就冇事嘅。我记得有一次我跳舞跳咗好耐，然后返到屋企又突然之间翻发。所以我就觉得做多啲gym，另外都要继续睇物理治疗去检查吓。”

Cheronna坦言自己亦受职业病困扰：“我好多问题㗎！我好少有感冒𠮶啲病，但系我身体上例如关节、肌肉酸痛嘅问题就好多！我有颈椎同坐骨神经炎嘅问题嘅，有时就要去针灸，有时就要去“啪骨”啪番正个位。早排因为我瞓觉时间比较少，又饮得唔够多水，我谂因为咁所以我个颈椎啲肌肉就绷得好紧，我本身条颈系歪嘅，跟住再歪啲，所以变咗我嘅右手上臂痺咗，我直情有段时间跳唔到舞！”

Aka和Cheronna虽然经常像糖黐豆一样“黐到实”，但二人却甚少一齐跑步，Cheronna解释：“（两个人练）真系好耐之前喇！我哋练跑通常都喺自己屋企附近，佢（Aka）好远啰（笑）！”她表示二人的跑步习惯亦相当不同，Aka习惯夜跑，而自己则喜欢在阳光下跑步。（谁跑得较快？）Cheronna笑言：“我哋唔比拼，我哋好和平㗎，哈哈！”Aka：“我哋enjoy㗎咋，同埋通常跑跑吓就会唔知对方去咗边！”

临近慈善赛，有否“戒口”或按照健康餐单进食？Aka坦言要多食肉类：“因为我平时系好少食肉嘅，所以希望依家食多啲肉有多啲蛋白质去令到全身嘅爆发力强啲。”Cheronna则透露由三月开始跟健康餐单进食，并强调一定要有碳水化合物：“一定要有少少carbs（carbohydrates），因为我觉得carbs会好影响我嘅心情！（怕肥）咪唔好放喺夜晚食啰，你可以晏昼或者早啲食，例如红米、糙米。我嘅餐单本身就走油、盐、糖嘅，我觉得都ok吖，应该handle到嘅！”她亦提醒跑步前可以食香蕉或能量啫喱：“但唔好食太多，我试过食到想呕！”

满意现时的身形吗？Aka笑言自己最巅峰的时期于举行演唱会期间，亦是最“听话”的时期：“一个月净系食烚鸡肉、烚鸡蛋，菜系唔加油盐糖，一日两餐，净系饮水，真系一个礼拜就瘦！再加上𠮶阵好勤力做gym，所以真系好firm。”Cheronna忆述当时的惨烈回忆，坦言：“𠮶时真系，做gym真系想杀死我，每一次都想喊！”

二人亦提到，今次参加慈善赛的最大原因是为了筹善款，支持Unicef以创新科技进行全球抗爱滋工作，帮助爱滋病患者。Aka和Cheronna亦各自开设了一个筹款专页，希望透过自己的力量鼓励粉丝们一起参加这个相当有意义的活动。问到二人有什么策略令人踊跃捐款，Cheronna奸笑道：“我谂朋友可以逼嘅！（与Aka对望爆笑）Fans嘅话，我谂我哋唔使讲啲咩，佢哋应该会自己参加埋一份添！我哋嘅（筹款）目标呢...”Aka笑言：“越多越好喇！一万啦？”

喜爱运动的人怎会不喜欢看奥运？提起下年的东京奥运，Aka和Cheronna马上双眼发光，雀跃表示很期待！Aka马上举手说：“我最想睇体操同埋跳水！”热爱水上活动的Cheronna大力点头：“我都想睇跳水呀！我自己最钟意睇游水同跳水，但田径都好好睇，我想睇relay（接力赛）同跨栏！”Aka反驳道：“但系田径太快啦！仲有韵律泳，好好睇呀！”Cheronna听都觉得劲兴奋：“哦系呀系呀！”然后她们两个就继续盘点想看什么奥运项目（几乎全部），从言谈之间亦能看到她们对运动充满热诚和喜爱......

场地提供：Adidas 

发型（Cheronna）：Calvin Tsoi

发型（Aka）：Alva Lam

化妆（Cheronna）：Melody Chiu

点击观看更多访问图片：