蔡少芬帮囡囡古法剥牙　拍埋短片分享：那有小孩自己要求拔牙？

“讲嘢最紧要有牙力，睇牙就系要拣有实力”今时今日大家牙痛，当然系上网睇下附近边度有牙医。正怀有第三胎待产中嘅蔡少芬，除咗同家人朋友见面聚会轻松下，唔少得凑2个囡囡，呢日仲分享佢帮信儿剥牙嘅片段。

蔡少芬（ADA）同张晋已经育有8岁大女楚儿及6岁二女信儿，最近信儿踏入换牙期，正常小朋友最怕就系见牙医，唔知系咪因为咁，信儿居然向妈妈求救。Ada呢日喺微博上载短片留言话：“那有一个小孩自己要求拔牙呢？”

见到片段中Ada手执一条线，信儿坐喺旁边既紧张又期待，爸爸张晋揸机影到历史性一刻。Ada将线套到要剥嘅牙上，一边话唔够力分散信儿注意，下一刻已经用线将乳齿剥出嚟，然后笑住执返只牙再叫囡囡咬住纸巾，古法剥牙过程快狠准，最后齐齐向镜头举V，网友笑言童年回忆返晒嚟，赞妈妈悭咗几百蚊睇牙钱呀。