蔡少芬46岁生日宣布“封肚”　促邓丽欣加入人妻联盟：快啲结婚！

蔡少芬（Ada）昨日（17日）迎来46岁生辰，同公司一众艺人包括张晋、朱茵、邓丽欣 （Stephy）、原子鏸丶欧倩怡、戚其义等，集聚一堂为寿星女 Ada 送上惊喜。大腹便便的 Ada 人逢喜事精神爽， 以一袭白色连身裙现身，神采飞扬，十足“开笼雀”一样，同大家分享陀B心得。

廿四孝老公张晋不止为太太惊喜送上一束46枝玫瑰以及粉红蛋糕，还亲手撰写生日卡，𠱁得Ada四万咁口，认真别具心思！Ada更情不自禁不时向张晋送吻，羡煞旁人。事后她笑言：“佢记得我生日，仲准备咁大束花，已经好开心！”问到张晋可有送礼物给她时，Ada表示：“对上一次收礼物已经系圣诞节，当时佢送咗个手袋畀我，其实好感恩，我哋两个都冇乜物质缺乏，买礼物都系为咗𠱁下对方，佢仲话我今年都冇送生日礼物畀佢。”

提及生日愿望，Ada直言最紧要平平安安生个健康BB，她还透露昨晚撇低两位女儿张楚儿、张信儿，与张晋共度二人世界：“寻晚有朋友送咗一间酒店房畀我哋，所以我要撇低两个女，好好去享受，佢哋朝早已经同我讲咗生日快乐，仲叫我玩得开心啲。佢哋两、三个星期前已经送咗生日礼物畀我，佢哋将自己钟意嘅玩具放落鞋盒送畀我，不过转个头就攞走晒。”

此外，当日朱茵在祝贺 Ada 时，还讲笑叫 Ada 再生多个，成为“多产”艺人，而一旁的Ada 闻言即谓：“啋过你！呢啲‘多产’我唔要，工作𠮶啲‘多产’我就要。”提到朱茵的“多产”论，Ada 回应到：“同朱茵大家咁话，叫佢追多个先，而 Stephy 就快啲结婚啦！我就够喇，冇手再抱，我老公要留番一只手揽我，所以我‘封肚’，生埋呢个够晒数。”