【关智斌演唱会】中秋夜处男红馆开骚 古巨基自告奋勇组团跳唱
撰文： 洪晓璇
出版：更新：
中秋夜除咗系人月两团圆嘅日子，亦系Kenny关智诞处男个人红馆演唱会首场，呢次个唱Kenny获公司上下全力支持！古巨基系Kenny演唱会嘉宾之一，佢透露当睇到Kenny早前回应Steven事件短片中，讲到原本即将实现梦想但突然破灭，基仔坦言睇到很揪心，第一时间同经理人霍汶希（Mani）讲：“唔好唔搞呀！一个人都搞！有乜嘢我可以帮嘅我一定帮！”
及后私下相约Kenny辅导鼓励，到最终定案变成Kenny个人演唱会，基仔向Kenny提议：“合作环节不如我陪你变成一个组合唱跳啦！你系Kenny Kwan、我系Ku Kui Kei，咁多‘K’我哋就叫‘KK TEAM’啦！”
基仔更义务亲自设计二人合作环节服饰。另外，虽然跳舞并非基仔强项，不过仍甘愿“抛个身出嚟”为Kenny做“舞男”：“如果你需要快歌的话，我同你跳舞都得，虽然我跳舞唔叻，但我花多少少时间都可以跳唱快歌。”绝对系仆心仆命！
虽然基仔谦称自己跳舞唔叻，但到排舞时，Kenny对着基仔大叫：“哗！你呢个动作好难！”基仔就话：“等我教你啦。”经过基仔悉心教导，Kenny很快便学会。排舞尾声，只见Kenny、基仔及一众dancers在做掌上压，问二人发生咩事，基仔笑着说：“我懒搞笑话过两日嚟帮大家操练吓，佢哋就话：‘好吖，做掌上压吖！’其实我做唔到㗎。”