【任噏乱评．港姐2019】没惊喜如何争收视　恢复三小时节目成出路

2019香港小姐昨晚正式完结，尤记得上年陈晓华夺冠，不少人也有点惊讶，但相对前年的雷庄𠒇，当然较容易接受。今年冠军黄嘉雯算是众望所归，由赛前大热一直跑到夺冠，季军古佩玲在决赛前狂“被造势”，先被传出有前内地干部的爸爸，继而在“今日头条最喜爱香港小姐”先下一城，拎个季军合情合理。至于亚军王菲，一直低调行事，爆冷爬上第二，不过比赛从来只会记得冠军，我问你上年亚军系边个你记唔记得？

赛果尚算合理，正面去看，无线无造马，观众收货。不过另一方面睇，赛果无讨论性，近年大家讨论得最多，到而家都记得，一定系2017年香港小姐冠军雷庄𠒇，无论系踩佢定撑佢都有一班人不停讨论，所以咪够爆！两年后都会记得有件咁嘅事。今年赛果唔够爆，两个钟嘅决赛过程又有冇嘢值得留意？

唔会冇！但未必系好事，甫开骚，10位佳丽鱼贯登场，著住晚装跟一众评判玩二选一嘅快问快答，过程唔特别，有一点笑位，但难以令人留下深刻印象。转头换件衫，今次系玩同200位现场艺人玩“有口难言”，如果唔系个骚冇咗曾志伟，真系以为睇紧掌门人。话就话考急才，不过短短20秒真系睇唔出10佳丽展现到咩急才，呢part的确唔能够令人满意。

之后10位佳丽同被TVB封为“TVB十子”一齐跳舞，好可惜，只有一两位佳丽表现尚可接受，其余跳得相当生硬，明显平时冇跳开舞兼且训练唔够，虽然每位佳丽都系短短十几秒，但识睇嘅人真系睇到唉声叹气。之后到大家期待嘅才艺表演，打头阵的3号梁敏巧表演反手弹琴，可惜甩拍又要偷望，唔知系紧急定训练唔够。2号蔡嘉欣玩空手瑜伽算是比较亮眼，至少没像上年冠军陈晓华在表演时甩拖，可惜佢竟然止步十强。4号姚懿芠表演光剑舞，不过“揈”几吓就当表演，真系好难令人接受，6号陈熙蕊嘅rap直头令人尴尬。至于才艺表演最令人欣赏的，一定是10谢采芝唱歌，一开口就知系高手，可惜佢唔系香港人眼中嘅“靓女”，入到五强算有交代。

除咗才艺表现，一众佳丽泳装出场都系年年令人期待嘅环节，不过今年就想讲吓个舞台。众所周知，砖地一向跣，加埋个场不停洒水，佳丽们仲要著住对高踭鞋，唔只有一个差啲就跣底。其实呢个舞台设计真系令人相当疑惑，系咪真系冇谂过会跣呢？另外，上年都已经讲过一次，一众被foul的佳丽，依然要为晋级的佳丽做表演、做过场，上年人人黑面，最出名当然是工藤佑采，今年虽然冇黑面，但真系唔明白点解仲要有呢个安排。

虽然就咁睇，好似踩多过赞，不过喺两个钟搞出一个咁多人嘅骚，算系咁，真系好令人怀念以前有三个钟嘅港姐。要讲到赞，其实唔系冇，上面讲过才艺表演入面，蔡嘉欣同谢采芝同值得畀掌声，另一个表演都系唱得相当好，不过就唔系佳丽们，而系周柏豪。柏豪睇嚟无受早前新闻影响，依然卖力演出，其实如果下年港姐搞返三个钟，邀请多啲实力派艺人表现，会唔会更好呢？