谭咏麟广告Facebook无限洗版　网友崩溃：到底畀咗几多钱

一个艺人广告愈多曝光率愈高，通常代表愈红，不过凡事总有例外。大部分香港网友呢两日上Facebook，应该都发现不停见到谭校长，几乎每隔三个post见一次，简直好似“谭咏麟链”，即使不停report都好似野火烧不尽咁，简直好似新一代都市传说。

睇返呢类广告，都会有谭校长大大个唛头，加豪宅或私人飞机或名车嘅相，再唔系就拎住一张好多个零嘅支票，但好明显系Key上去嘅，文字都系讲“谭咏麟的投资心得”，繁体字同简体字都有。如果Click入相关广告，都系关于比特币（Bitcoin），仲有部分用上谭校长接受ViuTV主持罗沛琪访问嘅相片，以增加可信性。

其实谭校长所属公司喺8月已经出过声明，表示已经备案并保留法律追诉权利，沉寂一排又再涌现，而且见一个Report一个，依旧不停见到唔同专页推出嘅谭校长广告，呢啲专页大多系开咗冇几耐以及只有几十Fans。网友都好崩溃咁问“到底畀咗几多钱同时间先可以洗版洗到咁？”