泳儿许靖韵撞样似足饼印　接受挑战55张相中揾出自己

圈中有唔少艺人明明无血缘关系，但偏偏生到饼印一样，似足失散兄弟姐妹，古有郑秀文杨千嬅，近年就有泳儿同许靖韵，仲要同公司经常一齐现身，一个唔留神都会认错﹗呢日泳儿接受香港开电视《娱乐头条E-news Headline》主播马梓轩（William）专访，兼做个小测试睇下佢自己会唔会认错。

节目中泳儿于55张师妹许靖韵照片中，要揾返自己出嚟，最终佢只系用咗3秒就轻松完成挑战，佢笑言：“其实唔止同许靖韵似样，我以前读书嘅时候，好多人觉得我同一位同学个样系似到会叫错人！不过我又唔会尴尬，只系觉得好好笑，上帝应该做咗好多呢个样，然后散播喺呢个世界！”

虽然人有相似，但泳儿嘅歌声绝对系独一无二，佢谂返起2016年举行入行十周年演唱会后，经历失声长达一年几，坦言失声令事业陷入低潮：“𠮶时心情都几差，因为自己身体唔太好，亦都冇遇到一啲机会去开演唱会，所以我觉得有心无力，加上自己际遇，其实𠮶时心情系属于其中一个低谷！”

回复状态嘅泳儿，同很多歌手一样希望踏上红馆开骚。当被问到现阶段同发型师男友Ziv拉埋天窗，还是登上红馆比较快，泳儿表示：“呢啲嘢就冇时间表嘅，我觉得如果你问埋Ziv嘅话，我觉得佢都会想我上红馆先！我都希望将我第一个红馆演唱会，交畀佢做我嘅发型师！”