太太Shirley突传患癌噩耗 林子博忍痛陪打硬仗：我真系唔冧得！
“只要一有时间，我就会去教堂为太太祈祷。”电单车发烧友林子博早前与拍档卫志豪去到欧洲参与大型铁骑之旅，由德国慕尼黑出发，途经奥地利湖区、阿尔卑斯山、波希米亚林区、意大利北部高山湖泊和多洛米蒂山脉等，尽管沿路美景美不胜收，但子博始终牵挂刚被诊断患有癌症的太太Shirley。
现年48岁的无线娱乐主播林子博于2003年与Shirley结婚，婚后二人育有一对仔女，家庭美满又幸福。但突如其来的噩耗，几乎令这个幸福的家庭瞬间崩塌，子博接受《香港01》访问时说道：“有一次陪老婆睇完医生，因为个诊所系我表妹做嘢嘅地方，突然佢同我讲：‘我揾唔到你老婆，个报告出咗，情况好似唔系太乐观，跟住你自己知道算啦，下个礼拜复诊你同佢一齐嚟。’之后，就确诊太太患有癌症，要接受化疗。”
太太Shirley哭诉：老公，我系咪好烦？
“太太自从患病之后，都Keep住负能量，令我好担心，因为听人讲要Keep住正能量先可以打赢呢场仗。”其实除了Shirley有负能量外，子博在不知不觉中，情绪亦出现问题：“我发觉自己都开始有‘放空’呢个问题，成日六神无主，唔知自己有咩可以帮到佢，我太太做完化疗我要亲自帮佢打啲提升白血球嘅针，有一次帮佢见到我发吽哣，佢突然喊住同我讲：‘老公，我系咪好烦？’我喺𠮶一刻就醒喇，因为我嘅精神状态原来系好影响我老婆嘅情绪。”
子博包揽家中大小事：我真系唔冧得！
自太太患病后，子博开始包揽全家大小事：“𠮶段时间真系攰，朝早要煮早餐畀阿女阿仔食，之后送佢哋返学，我就要开工，放工又去买𩠌煮饭，陪老婆覆诊，真系好多嘢做比较忙，所以精神状态真系麻麻哋。一嚟好攰，二嚟唔知可以做啲乜，所以状态好差，差得好紧要，集中唔到精神。而公司都算系咁，娱乐新闻台知道我屋企有事，做咗好多唔同嘅配合畀我，令我可以有时间照顾太太。我真系唔冧得，冧咗会好麻烦。”
Shirley鼓励老公出埠拍节目
子博表示Shirley不愿影响他的工作，故十分鼓励他出发欧洲拍摄节目，“今次去《欧洲铁骑游》都要去成10日咁耐，出发之时都有啲担心，但老婆就同我讲要尽量enjoy我嘅工作同旅程，唔好谂太多。已经揾咗人照顾佢，除咗我班Fans之外，仲有亲朋戚友，定时定候都会上我屋企煮返畀佢食。其实最大问题系佢唔方便出街，因为出街系好容易感染到病菌，佢个抵抗力好低，因为做完化疗，个免疫系统好低，所以佢一定要食屋企嘢同少啲出街。所以都好多谢公司同亲朋戚友，佢哋轮住上我屋企照顾我老婆，啲Fans又会得闲打下电话问候下，所以我会放心好多。”
女儿担心妈咪病情泣不成声
至于女儿林咏渝和儿子林卓楠亦相当生性，子博哽咽道：“当时阿女知道之后都冇乜反应，但当佢上网了解一下系咩病之后，有一次我喺地铁话番畀佢听𠵱家妈咪嘅情况，佢喺地铁度喊到收唔到声。咁阿仔就冇咁流露于表面，但佢都好担心，因为有一次补习社嘅传道人打嚟话问我屋企系咪有啲事，因为见到阿仔情绪好差，之后我话系呀，因为我老婆有Cancer，原来传道人自己都患过鼻咽癌，所以睇得出患者家人嘅情绪。之后发现原来阿仔喺屋企好似冇嘢，但原来佢系唔开心，后尾老婆出院，仔仔都开心番。𠵱家佢哋都冇咩嘢，尽量帮佢哋分心，带多啲佢哋去玩，佢哋都还可以，令我好放心，因为顾少样，如果要顾埋佢哋情绪我都好惊自己爆煲。”
点撃下图睇更多一家四口的甜蜜家庭照！
虽然太太抗癌路漫漫，但子博依然会同甘共苦，坚持不离不弃。最后，子博更深情讲道：“我都有同老婆讲今次我系去做Survey，见到有咩好玩同靓景都会记低，当佢好番我就会带佢去！”
点撃下图睇二人甜蜜时刻！