【开心速递】刘丹变公园大叔情陷大妈：中佬废佬都逃唔出佢五指山
撰文： 邝钰莹
出版：更新：
《爱•回家之开心速递》剧情经常紧贴社会时事，昨晚（20日）播出一集“决战大妈舞”，以屯门公园大妈做背景，讲述熊树根（刘丹）由池美丽口中得知池富被大妈舞所迷惑，连生意都唔接，更挪用女儿池美丽嘅食饭钱去打赏大妈，又听到“中佬同废佬都逃唔出佢嘅五指山”，刘丹亦都忍唔住去一探大妈“媚媚”有几厉害。
见到有新客揾上门，大妈“媚媚”除送冰冻酸梅汤之外，亦透露自己本身系黑龙江舞蹈团成员，并楚楚可怜咁话自己“为生活先跳广场舞，都系靠苦力揾食。”结果，向来正气又孤寒嘅根叔，如同痴孖根一样，日日喺公园做散财童子，打赏利事每封唔系一千就系五百，笑言“月亮代表你的心，利是代表我的金”，风骚程度直迫Happy伯，又无视熊若水（吕慧仪）脱离父女关系嘅威胁。
池富风头被抢，亦终于有感自己嘅行为同根叔无异，决定抽身。见池富唔再沉迷大妈舞，根叔亦自觉任务完成，将身上所有嘅利时派晒比大妈后离场。一班大妈以为执到宝，结果打开之后，发现内里原来系根叔嘅金句“自力更生”、“回头是岸”……
+3