【后生仔倾吓偈】麦明诗冯盈盈公开自己骚价：拍3日外景1400元

最新一集《后生仔倾吓偈》嘅话题系禁忌话题，节目中，冯盈盈、麦明诗同陆浩明即席公开自己嘅骚价。麦明诗话自己加入TVB首年骚价为1400元，之后每年只系增加3、40元左右，而冯盈盈亦都表示自己骚价系1,400元，更笑言拍一集节目就算拍几三日都只系得呢个价。“book你拍三日外景，之后第四日叫你你返嚟配音，都唔知计唔计(多一个骚)。”

话题一转，去到“拍拖会唔会倾结婚”，麦明诗对住一众后生仔表示“而家倾都仲可以当FF，因为大家都未真系想（结婚），但到咗我呢啲年纪倾，男仔就会觉得女仔比压力佢。”后生仔阿枫认为男仔拍拖时主动同另一半讨论未来生活系好正常，但麦明诗就非常唔认同，未等阿枫讲完，就已经系咁话“false promises”再加多句“我最憎呢啲男仔”眼见麦明诗重复表示“我最憎呢啲男仔”，陆浩明即时醒水表示“讨论下，倾下啫，唔使咁嬲”，阿枫解释同另一半讨论未来可以令自己有目标，结果未讲完，麦明诗又爆seed“假希望啰，你揾到钱咩？你而家揾到钱咩？目标自己知咪得啰，使乜氹人哋？”见麦明诗咬住唔放，阿枫无奈表示 :“你真系受咗好大伤害”

一句“你真系受咗好大伤害”，麦明诗即时落泪，陆浩明拎纸巾之余，都八卦问一声“以前𠮶个成日讲呢啲比你听？ 定几个都系咁？”冷静过后，麦明诗表示：“咁我遇过，好明显，好多人都讲过呢啲嘢。”并透露曾经有位前度以“老婆”称呼自己，但就被佢阻止，之后佢又话同男友睇车睇楼、讨论去边渡蜜月等动作，感觉有如“利用家庭感去坤你”。拍拖唔讲将来，唔通日日就系“我爱你”同“我好爱你”？麦明诗好认真咁话：“唔使讲架呢啲野，你挣到钱直接做咪得到，如果唔系你做唔到，女方有期望，你又有压力……”睇嚟麦明诗嘅前度们都真系制造过唔少幻想空间，导致佢每次一喺节目中讲到有关话题，都非常敏感。