【后生仔倾吓偈】冯盈盈同居惨变工人　麦明诗：佢好多嘢无时间做

最新一集《后生仔倾吓偈》以结婚同婚礼题，身为嘉宾嘅何雁诗自爆早在5岁时已经被求过婚，而对象更系同自己同时同月同日生嘅男仔，就连戒指都收埋，成件事对于男友郑俊弘嚟讲，都几有威胁性，好在何雁诗都醒目，最后补一句“而家无联络啦”，并突然放闪“而家都好好，而家仲好”。当麦明诗随即追问系未代表可以结得婚时，何雁诗先系笑一笑咁话“我同郑生定我同呢个（指5岁求婚对象)”之后再话“随时啦”，睇嚟真系好事近㖞。

一众后生仔随后讲到“恐婚症”时，有人提出同居会发现另一半好多缺点。最近同男友宝宝同居嘅冯盈盈，亦即时举手表示非常有感受。“真系出事，好想叫妈妈，原来要做家务真系好辛苦，以前喺自己屋企有妈妈同工人姐姐，但而家自己做家务。发现系轮回地狱，今晚好努力做完， 听晚又要继续做，后晚又要做，永远都唔会结束。”

听到FYY大吐苦水，麦明诗突破盲肠表示:“佢做家务做到好多嘢都无时间做。”FYY直认不讳指本身谂住同居系可以过下温馨二人世界，点知而家每日就系洗衫、吸尘、洗衫无限loop。“做到好攰，一上床谂住倾吓偈，点知宝宝已经瞓咗。”