【开心速递】李嘉反串惊喜登场　享受扮女人：睇到拳头都硬晒

卢宛茵饰演嘅崔Auntie喺昨晚(31日)嘅《爱‧回家之开心速递》再度登场，今次主要目的系连帮佢𠮶位“靓绝唐人街”嘅失婚女儿少欣揾女婿，于征婚启事中，崔Auntie列出“女方嫁妆丰厚，年轻貌美，曾当选华埠小姐。”

同崔Auntie一齐揾女婿，仲有少欣嘅孖生哥哥少杰（李嘉饰），二人赫然发现潮伟（袁文杰）同龚烨（张景淳）符合女婿条件，于是设法将姻缘玉佩交到其中一人手上。点知玉佩最后落入保安昌仔手中，而呢位保安，更被少欣美貌所吸引，结尾留下暧昧伏线。

对于“靓绝唐人街”嘅少欣，唔少观众都表示十分惊喜，因为系由李嘉所扮演，向来都man味十足嘅佢著起女装戴上假发，再加埋温婉有礼嘅谈吐，竟然别有一番韵味。有网民更希望少杰同少欣都可以多啲出现喺《开心速递》。

李嘉接受访问时透露今次系第一次扮女人，并坦言终于感受到女生之苦：“首次系著高踭鞋，我著完几乎系行唔到，连反应都比唔到，再嚟就系戴Bra，我著𠮶阵扣唔到，要揾服装姐姐帮手，都几尴尬。”问到内衣size时，李嘉想了一想表示：“总之好大啦，戴完之后仲摄咗两个pad，我背厚但唔代表心口有肉。”李嘉又表示以后从不明白为什么女性要花如此长时间化妆，但经过今次就完全可以理解。“同埋自己不嬲都无头发，今次有假发可以跷都几正，成件事都enjoy，自己睇返相都硬晒，拳头硬𠮶只。”问到之后会否有更多机会客串《开心速递》，李嘉表示自己都想，但一切都要看观众反应。