张致恒偷食累事　英皇宣布搁置Boyz演唱会

Boy'z去年重组引起极大回响，又咁啱发生许志安偷食事件，导致9月红馆骚要取消，关智斌（Kenny）同张致恒（Steven）冷手执个热煎堆，成功入纸申请红馆档期。话晒都系出道16年首次开红馆，再加上Steven日前宣布做爸爸，以为喜事连连大可以加场再加场。但一夜间，Steven被爆一脚踏五船，形象直插谷底，估唔到红馆呢个偷食档期邪得咁紧要！

喺爆出一脚踏五船同时，Steven同Kenny原来正身处泰国拍摄演唱会宣传片，不过据知喺完成拍摄后，Steven已离队，经理人霍汶希(Mani）仲话︰“唔知佢去咗边。”到底Boy'z嘅演唱会会否因而受到影响，Mani下午正式宣布：“各位传媒朋友，经公司内部商讨及与各方共识后，原定于9月举行的 Boyz 演唱会将会搁置，公司现正积极商讨及研究处理方案。一旦落实，将第一时间向各位交待。多谢各位。”Mani解释由于Steven有好多事要处理，担心佢唔能够以最好嘅状态去准备演唱会，所以宁愿取消。