利君雅主持都冇乜人睇？盘点10大香港电台节目 《视点31》排第8
香港电台（Radio Television Hong Kong），简称港台、RTHK，喺香港广播史上首家广播机构，同时都系香港唯一嘅公共广播机构同最具公信力嘅电子传媒。港台作为一家公营经构，但系佢哋一直致力制作各种多媒体节目，提供资讯、教育同娱乐，报导本地同国际时事，真系维护咗香港嘅核心价值，即系多元文化发展，提供自由表达意见嘅平台。时代越系混乱，我哋就越需要持平、公正嘅媒体，发挥佢哋教育、监督嘅权力。港台为人民发声，正系佢近年越嚟越受香港人爱戴嘅原因。今日DailyView就用互联网大数据话俾大家知，到底港台咁多节目，边10个喺网上最多人倾喇！
DV小教室：互联网温度计透过《KEYPO大数据关键引擎》大调查观测咗近万个网站频道（而且不断增加ing），包括港澳地区的新闻频道、FB、IG同埋各大讨论区、Blog......透过强大嘅网文爬梳观测，攞到巨大嘅资料样本数，拎到上亿嘅文章及留言讯息，以人工智慧的语意程式做分析。
十、《五夜讲场》——咩都有偈倾
香港电台“五夜讲场”系列，由第一季2017年起，直到2019年第三季，五个节目一向深受香港文艺青年欢迎。“五夜讲场”系列嘅节目相当多元，逢星期一至五晚播放嘅清谈节目，2019年嘅节目包括有哲学、文学、历史、社会学科同科学。唔好以为清谈节目斋talk就好闷好无聊，呢个节目卖嘅就系口才，主持通俗贴地咁普及知识，集集都请嚟唔同嘅专业人马，针对各种议题火拼，连黄秋生都上过去讲哲学，相当唔简单。
九、《精灵一点》——城市人要保养
喺香港呢个文明嘅都会，已经唔会有咩人会饿亲冻亲，大家都活在贫穷线上，即系仲生存到唔会死咁啰。文明人，最多就系文明病。有边个香港人唔系日日低头对住手机，擡头就望住电脑？滑得手机多，手指关节好快劳损。望得电脑多，肩膀好快会唔舒服。港台节目“精灵一点”就相当贴心，每集时间都讲解医学，请嚟专业人士，针对各种身体嘅都市病，教教我哋平时点样保养，减轻身体痛楚，唔怪得咁受大家欢迎。
八、《视点31》——我爱利君雅
利君雅，近日因为佢为人民发问，成为咗新一代嘅新闻女神。大家又有冇留意，而家港台节目《视点31》嘅主持就系佢同另一位拍档彭德章，呢个节目短短25分钟，但就分开咗四节，每集都讲香港时事嘅四个议题。
▼▼▼利君雅追击林郑逐格睇▼▼▼
佢哋唔单止会做好详尽嘅报导，亦都会有人物专访，仲包埋唔同持分者角度嘅发言。好似最新7月23号嘅《视点31》就请咗何君尧、朱凯廸就元朗黑帮无差别恐怖袭击对谈，火花四溅，何生仲拍台走人，相当激动。
▼▼▼何君尧拍台走人逐格睇▼▼▼
七、《星期六问责》——人民问责制
香港政府推出“问责制”已经相当多年，问责问责，问咗咁多年，的确都有唔少官员因为咁而下台。呢个节目嘅名明显来自于此，每个星期六都针对香港最近嘅时事问题，请咗两至三位唔同立场嘅人物，不断咁发问，打烂沙盘问到笃。好似7月20号最新一集，就针对《反修例示威》请嚟立法会议员范国威、葛珮帆两位，一边系香港本土优先，另一边系民建联，两位就住香港大事发表意见，边个要负最大责任？
六、《警讯》——我细细个已经睇
香港港台节目《警讯》，每集都讲解唔同嘅香港常见犯罪手法，好似宝药党咁，犯罪者向妇孺落手，话有值钱嘅药要低价出售，帮佢哋买药材，一定有得赚。《警讯》长期以嚟提醒香港市民唔好俾犯人乘虚而入，恶意欺骗，真系令罪案率降低好多。呢个节目最受欢迎之处，紧系佢哋唔系照本宣科，只系讲解法例，而系有娱乐性嘅故事。其中最受网民关注嘅，紧系“心型锁”宅男喇！
五、《头条新闻》——讽刺时事超高质
《头条新闻》一向系港台节目嘅招牌政治时事节目，历史相当悠久，喺1989年4月4号播放第一集，一直断断续续做到今时今日，唔少Fans都话呢个节目代表咗新闻自由、编采自主。“我们深信，言论自由是香港的基石，我们承诺会继续站在香港人一边，讲良心话，这是《头条新闻》的核心价值。”港台呢个介绍，真系实至名归，唔怪得近日“反逃犯条例”事件，《头条新闻》次次一出都受网民激赞喇！
何韵诗不从政有原因？即睇《头条新闻》专访▼▼▼
四、《日常8点半》——日日唔同主题
港台节目《日常8点半》，前身系《自在8点半》，逢星期一至五，八点半，都会播放同香港有关内容，可谓集合旅游、亲子、教育、健康、消闲、饮食同民生等热门话题嘅杂志式节目。星期一讲民生、旅游，星期二讲民生、亲子与教育，星期三讲民生、健康，星期四讲民生、消闲，星期五讲民生、饮食。近日香港书展开幕，可谓一年一度嘅文化盛事，节目就访问咗科幻作家李伟才，介绍书展详情，大家要去记得睇喇。
三、《议事论事》——温和讲香港政治
港台节目《议事论事》相对《头条新闻》作风较温和，节目风格亦都比较正经，节目除咗会针对香港最近时事、政治事件报导、访问，仲有其他环节，好似目前嘅常驻主持就有前立法会主席曾钰成〈论政〉，同前公民党主席余若薇〈见薇知著〉交替播出。佢哋学问好，虽然立场唔同，但不论边个阵营，都系受到香港人所尊重嘅。持平、中立，包容各种讲法嘅言论自由平台，正系香港嘅核心文化，议事论事，做香港人。
二、《城市论坛》——港台收视之冠
香港议政节目，《城市论坛》一定系最出名，亦都系最公平开放嘅平台。既然话系论坛，紧系要喺公众地方举行，先够开放，先可以俾大家参加。目前每逢周日，《城市论坛》都会喺铜锣湾维多利亚公园内举行，透过电视同电台直播，俾各位唔喺现场香港人嘅睇。节目除咗会请唔同议题唔同立场嘅代表人物，亦都会请各间中学嘅中学生到场发表意见，成为咗唔少学生嘅政治启蒙，真正做到教育公民责任嘅效果，相当有教育意义。
一、《铿锵集》——最长寿新闻纪录节目
港台节目《铿锵集》，喺近日香港自6月9号嘅“反逃犯条例”事件，已经播出过《让声音看得见》，详尽咁讲返逃犯条例事件嘅始末。到《这年初夏》，访问几位只系读紧中学但坚持抗争，为香港发声嘅年轻人；而7月22号最新播出《612/721的伤口》，专访两次警民冲突中枪、受伤同流向嘅香港抗争者，伤痕既系留喺身体，亦都留喺心入面。香港人，香港咁多伤口，前路依然漫漫，仲有几多血要流？香港，只能靠香港人。（《铿锵集》节目截图）
分析说明：本研究资料由《KEYPO大数据关键引擎》提供，分析时间范围为2018年07月15日至2019年07月16日。互联网大数据系统观测港澳地区上万个网站频道，包括新闻频道、Facebook、Instagram及各大讨论区、BLOG等，针对讨论‘香港电台电视节目’相关文本进行分析，并根据网友就该议题之讨论，作为本分析依据。本文分析之结果，非参考投票、民调、互联网问卷等资料，名次仅代表互联网讨论声量大小，不代表网友正负评价。
延伸阅读：
网民睇“逃犯条例”讲咩多？ 香港人民嘅主场，键盘战士都系战士
【本文由“DailyView 互联网温度计”授权转载，研究资料由“KEYPO大数据关键引擎”提供。】