【后生仔倾吓偈】麦明诗私补每小时$1000：补咩都得总之俾钱就得

最新一集《后生仔倾吓偈》以补习题，节目一开首，冯盈盈重提麦明诗读大学时，兼职做私人补习老师，1小时收费1000元，虽然系旧闻，但一众后生仔听到都好大反应，仲问到底补啲咩要收呢个价，麦明诗就话：“我个履历写咗，你钟意叫我补咩都得，总之比钱就得。”听到呢个offer，相信唔少家长都会心动，不过如今麦明诗身份已经唔同，就连自己都笑言“听讲港姐时薪再贵啲”，所以结论就系“我又良心过意唔去（收咁贵）， 所以就金盆洗手。”

女拔出身嘅麦明诗，当年会考获取十优成绩，虽然佢话都有帮衬补习天王，但强调完全唔系为咗“tip题”:“因为我最弱真系中文，同埋中英文真系唔系靠补习，系靠由细到大浸淫同写文。”摆明话自己天资聪颖，其后麦明诗又透露当年曾经系中文科补习天王萧源嘅学生。“佢系纯粹几好笑，同埋佢好无聊，成日将自己个名隐藏喺范文。”其后众人讨论点解需要补习，有后生仔认为“学校搞得掂，根本无人需要出去补习，虽然唔系话学校老师废……”，并分析指出有学校只系注意考试成绩，但亦有学校较为注重传授智识，而补习社纯粹系应试技巧，但对于后生仔嘅言论，麦明诗就似乎唔多认同，仲问点解要讲得咁婉转，并直指“我觉得直情系废”，到底系香港教育制度，定系老师的问题令麦明诗有咁嘅结论呢？怕且只有佢本身先知。