【罪光灯】陈振聪风水秘笈其实系邪术　拆解何谓种生基

ViuTv节目《晚吹－罪光灯》最新一集以“天图布局骗财之谜”为题，当中嘅《天图布局》其实系目前仍在狱中嘅商人陈振聪，早年对外声称嘅为家传风水秘笈。节目嘉宾玄学名师江静川表示曾经因一位风水老前辈嘅关系而睇过《天图布局》嘅内容，但原来呢本秘笈嘅内容，绝大部分都系故弄玄虚。“有个一齐学风水嘅老前辈当年佢喺电视台做编剧，负责编武侠小说，佢话呢本《天图布局》系假，自己都有份帮手编，好多内容都系根据佢哋本身做编剧写故仔嘅模式，而将𠮶样嘢作到好完整出嚟，令到人去相信。”
 

他指出《天图布局》其中的“慑魂”、“灵”等章节，提到可以扰乱人嘅思维令对方信赖自己，但行使天图布局的人，无论系施法者或者当受惠的时候都会短寿15年。“我睇晒啲资讯都觉得好恐怖，呢啲已经唔属于正统风水学，而系邪术。”其实当年喺法庭上，代表华懋嘅资深大状骆应淦曾公开喺陈振聪风水学会中流传嘅《天图布局》讲义内容，除有〈影术〉、〈魂摄〉及〈天星化难局〉等章节外，亦涉及烧纸币的仪式，更有挖井灌鸡血，甚至雕人形公仔滴人血的情节。

节目中，主持人欧锦棠、可宜和花家姐亦对喺呢场世纪争产案中出现嘅“种生基”甚感兴趣，玄学名师江静川解释所谓嘅种生基除可改运外，亦有续命。“风水师傅会根据风水法则行山寻龙点穴，揾到龙真穴后，要知道个位得唔得要先试验，喺呢个位掘出位置，同落葬先人无分别。种生基时会用一啲器皿放入同自己有关嘅嘢，包括头发、指甲、衣物甚至牙齿血液，将呢以上东西藏喺木头公仔，公仔上会刻上种生基嘅人嘅时辰八字，同埋当中会牵涉少许符章。”江静川指出种生基是希望借风水地给予力量及福分，一般会在龙真穴位置上立墓碑，如果想要续命的话，建寿坟时不能立墓碑，并谓“陈振聪所做嘅唔系正统寿坟”。

龚如心生前透过陈振聪种下的“生基”风水穴，分布在华懋集团旗下，全港三十七幢物业内外，总数多达约一百四十九个。洞穴内藏的东西千奇百怪，计有铜钱、古玉、龚如心的相片、带香味的公仔、月饼都有，而部份古玉，更刻满符咒，数量多到可放满两个房间。