罗仲谦回巢拍剧不忘放闪：想多啲时间陪老婆

罗仲谦同杨怡婚后恩爱程度一直有增无减，为咗可以令老婆做幸福少奶奶，罗仲谦近年更频频北上赚人仔。不过，为咗可以多啲时间陪老婆，兼进行造人大计，有传罗仲谦将于8月返TVB拍剧，而对手更系一线花旦。刚于上海完成电影宣传嘅罗仲谦接受《香港01》访问时就话:“等TVB公布啦，其实一直都有倾紧，大家都非常之有诚意。自己都想多啲留喺香港，一来可以陪老婆，二来真系好耐无同香港观众见面，希望倾得成，咁就可以同兄弟班合作,我自己一直都想返去拍嘅。”
 

罗仲谦对上一次拍TVB剧集已经系2016年嘅《潮流教主》，再与大台合作，问到会否乘机加酬，罗仲谦笑而不答，但问到会否叫埋老婆杨怡一齐拍剧，佢就话一啲都唔介意：“自从《On Call 36小时》之后，就无同太太合作过，我都希望将来有机会可以同呢位民选视后合作！”呢位爱妻号果然名不虚传。

对于回巢一事，罗仲谦抱乐观态度，相信成事机会十分高。据知，由他与任达华主演嘅电影《小Q》，将于8月喺香港上映，届时罗仲谦将留港宣传，如果真系拍剧的话，简直系配合得天衣无缝。