【早霸王】男听众对住女神每事google　森美：就算一齐都会爆炸

由森美、小仪同Marco主持嘅《早霸王》“你知道唔知道有人挂住你”环节，撮合过不少情侣。之不过，今次男听众亚Gi嘅状况，就连森美听完之后都觉得非常渺茫。亚Gi表示自己系透过交友apps结识对方，倾咗几星期后开始约睇戏、继而系行街食饭，“差不多日日见”之余，有拖手又有咀咀，之不过，对方似乎一直都未应承呢段男女朋友关系。而亚Gi仲话之前因为发生咗啲事，令双方关系变差，甚至系“已读不回”，到底系咩事呢？亚Gi话:“最主要系同佢沟通有问题，有时同佢讲嘢我唔出声。”之不过，到底女方讲咩令到亚Gi可以唔出声，佢又话一时谂唔起，只系话有同过对方表示自己唔系好识答，需要啲时间google search。

为此森美都十分好奇，并细心同Gi分析，最后得出嘅结论系：“你同佢系唔对咀，有时当男仔比女仔叻，咁可以照顾到对方，但当情况对调时，未必系咁好。又或者系我对件事无睇法，但都可以有嘢讲，我有朋友系问亲佢嘢都答唔到，做唔到举一反三，如果你将来同佢喺埋一齐，而佢又唔系钟意呢类人，佢会爆炸。”森美指亚Gi太在意一个好嘅答案，但其实好多时女仔只系想沟通，而并非想得到一个好实在嘅答案。“爱情就算做啱晒，都可以唔钟意你。”他同时安慰亚Gi，指每段关系都可以令人成长与学习。

电话接通亚Gi心谊对象Divina后，由于工作环境关系，所以Divina一直以英文作答，搞到森美都难以入手，最后Divina以“我可唔可以迟少少打返比你”为由收线……收线后，森美都忍唔住表示：“岂有此理”并认为亚Gi靠害，唔一早讲明原来系要以英文进行，又笑言自己英文程度只系去到lady and gentlemen，并谓“其他果啲我要查同写稿先”最后，亚Gi只能单方面发表发的宣言，虽然佢话会努力改善沟通问题，唔会令对方有被遗弃感觉……但睇怕呢段感情都唔会有好结果。