【如果这样生活】经历婚姻失败后仍相信爱情　陈炜：以后睇嘢好清

于08年下嫁台湾商人嘅陈炜，喺最新一集《如果这样生活》中，重返昔日有唔少甜蜜回忆嘅台湾，并剖白离婚嘅原因。“事业同爱情你会点拣? 11年前我选择了爱情，觉得为咗自己心爱嘅人可以放弃一切，佢系我世界嘅全部，无谂过……原来爱情会有消失嘅一日，然后又回归到原点，一个人生活，继续我嘅演艺事业，成为观众心目中嘅最受欢迎电视女角。”

对于离婚一事，陈炜曾经表示一度要睇精神科，而佢亦曾在访问中话过：“前夫太专注事业，时间耐咗，我就好似屋企电器咁放埋一边，咁做朋友好过做夫妻。”喺节目中，陈炜表示仍然相信爱情，喺拜月老求姻缘解签时，被问到“现在有喜欢的人吗？”时，佢就笑笑口表示：“都有啲范围，但未落实。”当得知签文解读为“朦胧的状况”后，陈炜并未因而感到担心，仲话“由而家开始有目标，同埋我配咗眼镜，以后睇嘢可以好准同好清。”

陈炜喺节目中讲及上一段婚姻时，似乎仍然有少少伤感：“传媒其实一路都好关心我嘅感情，见我唔讲唔讲咁，我之前一路都唔讲系因为想保持住呢段关系，我觉得可以有挽救嘅机会，所以唔想讲，我自己都唔想分开讲真，呢个唔系我嘅意愿，离婚呢样嘢系佢提出，佢觉得佢嘅工作上有啲事佢要去处理，要摆好多时间，亦觉得佢有亏欠我，既然佢无能力付出佢嘅感情，亦有好多嘢要处理嘅时间，就觉得不如中断呢段关系啦。”陈炜早年喺拍摄综艺节目时，曾揾埋老公出镜，直到2017年被爆二人已离婚5年时，她才承认二人已分开一段时间。