【诡探前传．专访】林钰洧刘沛蘅够抢眼 扬言入行预咗挨十年
《诡探前传》虽然已经播放完毕，而且讨论度未算太高，不过却令两位“剧坛新人”成功打入观众的眼帘，她们分别是饰演朱女的刘沛蘅（Hillary）和饰演夏文欣的林钰洧（Denice）。
两人虽然出道的经历各有不同，Hillary 2008年便以模特儿身份打入娱乐圈，而Denice则是星二代，是TVB 80年代男星林俊贤之女，不过也是近年才全心全部投入娱乐圈，不过两人却有共通点，就是同为“剧坛新人”。Hillary比较多经验，至少拍过网剧，而Denice则完全未接触过电视剧，只曾在电影客串演出。
作为一个新手演员，而且要面对秋官郑少秋、陶大宇这些大前辈，对于第一次拍剧的你们，有否感到困难呢？
Denice：我当然觉得很难，因为我直情冇拍过任何电视剧电影，一嚟就嚟一个挑战性咁高嘅角色。其实我初头接嘅时候都非常之觉得紧张，都系一定要不停做好多REASEARCH，睇好多鬼戏，仲要唔系鬼戏咁简单，系驱魔嘅戏去学佢哋嘅动作。
Hillary：咁我就系有拍过广告、MV，电影方面就客串多，今次都系第一次一个咁挑战性嘅角色，咁系做咗好多REASEARCH。同埋喺拍之前，其实导演都安排咗我同其他演员见面，所以拍起上嚟其实都几顺畅，因为沟通咗。
在娱乐圈，虽然两位样子姣好，但要突围自己总要有点独特之处，你们觉得自己的特点是甚么呢？
Denice：我从来都冇谂过点样可以喺呢个圈入面突出自己，我净系成日谂住如果我真系要做一个演员嘅话，最紧要系自己做好个戏做好自己，不停学习。我觉得一切都会好似一个Flow咁样嚟，唔系我去突出我某一样去吸引一啲嘢，因为做得一个演员其实你系百变，我就觉得一定要学好自己，做好自己先啰。
Hillary：我觉得每个人都有独特之处，即系可能，我个样系比较Baby face啲，或者天真啲，好怕羞咁样话自己。但我觉得因为喺电影呢个行业，其实有好多可能性，同埋需要嘅人都好多好唔同，咁我觉得希望自己都可以喺呢行入面会被需要。我觉得我嘅卖点比较真性情啲，其实我唔系好多，虽然大家都觉得我有好多偶像包袱，但其实我冇乜包袱，即系我玩起上嚟或者做嘢，其实我都系大癫大肺𠮶啲。
做演员，一步登天基本上是没有，挨出头来是常识，但后生女最重要当然是青春，如果要挨十年才能获得一个金像奖提名，你们愿意吗？
Denice：你话10年后先攞到一个，可以有机会被提名，其实我觉得，就算唔提名我拣咗呢行，拣得做演员我都会继续落去。
Hillary：其实我喺呢一行都唔系一个短嘅时间，但我觉得唔系话为咗攞到啲乜嘢， 而系不停学习，不停去试，同埋做紧自己钟意做嘅嘢啰，所以我唔觉得系嘥紧时间，或者我要喺度浪费一段时间先可以喺度得到一啲嘢咁样。
Hair by Chris Lam
Make up by Kyo Lee
Hillary :
Outfits : The Kooples
Shoes : Christian Louboutin
Denice:
Outfits : Miss Sixty
Accessories : APM Monaco