【专访】狄龙对电影仲有火：有啲人为赚钱拎好多垃圾炒埋一碟

电影《搭错车》于1983年上映时获奖无数，36年后以舞台剧形式在港演出，并由狄龙及阎奕格饰演剧中嘅父女角色。身为电影编剧嘅黄百鸣表示《搭错车》原先系一个喜剧，不过就在开镜前夕，黄百鸣决定改成悲剧，并飞到台湾闭关48小时写出完整的剧本，“因为新艺城早期以喜剧为主，𠮶时我单纯咁谂如果将悲剧做到三分钟喊一喊系未可以work呢？《搭错车》系我人生最快完成嘅一个剧本，而家睇返当然可以更好，但当时要赶工所以无辨法。”电影当年叫好又叫座，令黄百鸣接连开拍《何必有我》、《阿郎的故事》，并成就了周润发、郑则士做影帝。

《搭错车》舞台剧再呈现　选角锁定狄龙大哥

作品将以舞台剧呈现，黄百鸣以及舞台剧监制高志森都认为狄龙系不二之选。以经典去形容《搭》的狄龙表示：“而家社会进步，虽然易咗满足，但心灵会系空虚，《搭》可以填补呢一部份，如果大家睇𠮶阵会喊，咁证明你仲有感情同人性，佢哋揾我可能系因为发现我平时都好木纳，其实我自己唔多讲嘢系因为觉得言多必失。”身为剧中女主角嘅阎奕格，前年演出完《风云5D音乐剧》孔慈一角后，仿佛开拓了新世界一样，令她有信心挑战《搭》阿美一角：“我唔会同电影中的阿美比较，因为每一个都系个体 ，但我觉得可以将自己嘅经历加埋入去。”阎奕格表示虽然面对前辈或多或少会有压力，但另一边厢她认为如果一直留在comfort zone并非好事，可以将压力变成动力，令自己可以做得更好。

狄龙批“电影寄生虫”为钱愚弄观众

戏中的哑叔是名哑巴，靠捡瓶子为生嘅佢，某日喺路边见到弃婴阿美，决心要将对方抚养成人。阿美长大后虽然成了红透半边天嘅歌女，但与哑叔嘅距离却愈来愈远……问到已为人父嘅黄百鸣同狄龙可会跟儿子有距离感，黄百鸣庆幸与仔仔都系电影人，度剧本时少不免会有冲突，但绝对系正常。“拗先好，唔拗听晒你讲都未必系好事，而喺拗嘅过程中会有火花，同埋剧本系对事唔对人，所以唔会影响到感情。”访问中，狄龙以咸鱼白菜去形容电影种类，并表示自己比较喜欢自然一点的题材：“有好多系刻意去扭曲或取重，博观众吸引，我成日都话我系电工，即系电影工作者，我唔想做电虫，即系电影寄生虫、拎好多垃圾嘢炒埋一碟去赚钱，养饱自己愚弄观众，咁系好可怕。”狄龙深明大家都需要揾食，但希望能够做到合情合理，又拒绝评论香港影坛是否有大量的电虫。

髪型 ：Mike Ting @ HAiR　（狄龙）、Haysses Ip @ HAiR（阎奕格）

化妆： Josephine @ J LAB（狄龙） 、julie.H @J LAB（阎奕格）

服装 ：PENNYBLACK（阎奕格）

场地：8度海逸酒店