【母亲节】钟舒漫笑称妈妈心中最好礼物：去揾个好男人做男友

钟舒漫（Sherman）以义工身分出席母亲节活动，到访中心与一班残疾人士，同佢地妈妈庆祝母亲节。活动上Sherman与一班残疾人士大玩游戏，活动后佢话透过游戏接触，发觉残疾人士其实相当可爱，亦了解到他们有属于自己嘅快乐，而这份快乐会比普通人来得简单。活动上一班残疾人士将康乃馨送到妈妈手中，真情流露对妈妈表达谢意。

Sherman亦趁机感谢妈妈嘅付出：“我自己阿妈，照顾我同妹妹都好艰辛，何况系要照顾一班情绪起伏比较大嘅小朋友，妈妈一定要付出更多耐性，同埋爱。”今次系Sherman第一次透过义工活动接触残疾人士，留下印象深刻：“我好乐意再做义工，希望自己可以起作用，可能系我嘅出现可以引起少少人嘅关注，只要能够帮到手，我都会想去做。”

以往母亲节Sherman都系请妈妈吃饭简单地过节，亦曾经亲自下厨。问到今日点同妈妈庆祝，Sherman就话：“因为今年妈咪唔喺香港，所以未庆祝，但妈咪成日都话唔使庆祝啦，因为做妈咪好多嘢要担心，讲笑咁话唔做妈咪啦！”Sherman话今年无准备礼物：“礼物就系我畀啲力去揾个好男人做男友，哈哈。”