张敬轩露脚毛著胶袋衫拍恶搞MV　容祖儿：呢只乐坛妖孽！

撰文： 洪晓璇
出版：更新：

如果要数现今香港乐坛嘅扮嘢高手，张敬轩认第二都应该无人敢认第一﹗之前佢嘅化身降两度大受欢迎更杀入红馆开个唱，当时一众女歌手已经笑言担心地位不保，呢日轩仔再创新猷变做“混血新人火龙果”，换上3个造型恶搞容祖儿新歌《Pretty Crazy》，激到Joey病咗声沙沙都要拍片话：“帮我报警青山走犯呀﹗我俾火龙果呢只乐坛妖孽激到火都无埋，声都沙晒想杀死佢呀﹗”

轩仔今次唔做降两度变身火龙果，净系睇呢张同JOEY嘅造型对比，已经相当似模似样。（张敬轩IG）
+13

到底轩仔如何激到Joey扎扎跳？原来佢将Joey新歌《Pretty Crazy》改为《Pretty Hungry》，唔单止影造型照，仲相当用心换上4个唔同造型，完美复制Joey大晒金钱飞到韩国拍摄嘅MV。轩仔介绍封面红色造型：“呢个系一个环保嘅循环再用胶袋碎造型，呢一部分个卖点就系对耳环，系打边炉用嘅筛，最特别就系今日再一次展示我茂盛嘅脚毛，如果睇完呢条片之后大家胃部有不适，请多多包涵﹗”

呢件红色歌衫居然系用胶袋碎制成﹗（影片截图）
Close up轩仔对美腿，到底系刺激收视定赶客呢？（影片截图）
造型舞蹈就连表情都学到十足，成功搏得网友俾like﹗（影片截图））

睇返两个MV对比又真系似模似样，难怪原唱Joey都留言话：“帮我报警青山走犯呀﹗俾我静一静都唔得㗎呢只长毛火龙果﹗我俾火龙果呢只乐坛妖孽激到火都无埋，声都沙晒想杀死佢呀﹗”轩仔就喺网上回应话：“今朝一早，阿年度亚热带混血新人火龙果打俾我，话佢啱啱加入娱乐圈就压力爆煲，要开始安排退休嘅事宜﹗啲传媒同公众嘅压力令佢紧张到有神经病，佢依家觉得自己prettycrazy，佢话㖞，你哋一个二个话佢恶搞，佢话佢喱啲系致敬吖﹗佢话：唉我咩都唔知吖我你哋自己睇下喇唉……”

轩仔为咗match返个名，放咗两个火龙果喺心口。（影片截图）

问到轩仔点解会有呢个二次创作《pretty crazy》idea？原来佢系想送份礼物俾Joey贺佢20周年演唱会，提到拍摄时最深刻嘅事，轩仔就笑言：“因为同事觉得我太为食，所以将歌词改为Pretty Hungry，仲特登为我做咗个零食背包，背包上面嘅零食全部都系我钟意嘅，仲有平时半夜直播食嘅零食﹗”不过轩仔觉得个背包太靓唔舍得食，决定稍后将背包送俾歌迷。至于点解钟意玩“low cost cosplay”？轩仔认为咁样先系二次创作嘅精髓，“咁样先体现出低成本制作出嚟都有好效果，同埋更加激发到创意。”

+4