【友台VIP】罗家英爆刘兆铭被无线老人约玩残：佢嬲到拍台

汪明荃(阿姐)入行至今逾半世纪，与无线合作48年，台柱地位无人能及，而佢亦多次喺访问中指自己从未谂过离巢。之不过，罗家英喺ViuTV节目《友台VIP》中，就话原来阿姐曾经因为感到不被重视而有谂过唔续约：“因为换晒人，以前同佢合作嘅同事换晒，唔重视Liza喺台嘅地位同埋对公司的贡献，忽视佢嘅存在，好嬲。佢打俾邵逸夫，对方亲自挽留佢。”

节目中，家英哥提到自己帮大台拍剧，但产量不多，当中《阿Sir早晨》更系黎明亲自出面邀请佢。“拍得好闷又时间长，所以之后薛家燕揾我拍处境喜剧我都推咗，但当时无谂到拍一套买一层楼呢一点。”言谈间，似乎觉得“走宝”。提到一台独大，家英哥表示曾与高层反映。“我同佢哋讲唔可以一早叫我返去等 ，唔好以为咁做系啱，你拍戏都唔会叫啲阿姐阿哥去等几个钟啦。”家英哥认为问题除出在“有人唔识写run-down”之外，最重要系无线认为自己系大台，艺人一定要听话。“唔听话雪你，但我唔怕。”

另外，家英哥又提玩谢唔少甘草演员的“一骚合约”，他表示自己未曾“领教”过，而无线或者系因为阿姐关系，所以向来待佢不薄。但好友刘兆铭就曾因为续约问题而嬲到拍台。“佢签咗完约一出门口就叫佢返转头，话‘刘生，你已经60岁，呢份约要取消，我哋要签过另一份约’，咁啱我同刘Sir拍戏，佢嬲到拍台话唔续约，本身已经准备好要拍《酒是故乡醇》。”

无线贱招真系无之不尽，家英哥于节目中又提到自己曾经都几钟意参加大台综艺节目，因为奖品十分可观，而佢最“劲揪”一次，系赢得一部价值十几万嘅车。“不过，有次我玩游戏赢到冠军，佢哋有好多奖品任我抽一份，我一抽系洗发水，后来静鸡鸡去后面睇，呢份又系洗发水，𠮶份又系洗发水，摆明装我，结果有成20几万洗头水，果时我已经系光头。”