张敬轩大马个唱前突然失声劲徬徨：歌手冇咗把声要开骚点算呢？

日前，张敬轩去到马来西亚云顶，可容纳六千人嘅云顶云星剧场举行《HINSIDEOUT演唱会》，全场爆满。为咗照顾马来西亚嘅歌迷，轩仔除咗特别安排一套新歌衫，喺歌单上歌曲亦稍作调整，加插咗香港站都冇嘅国语歌，好似《过云雨》、《想你想得好孤寂》等作品，十分贴心。

演唱会上，轩仔换上多套靓衫，又唱又跳十分卖力，台下歌迷亦都好热情，几乎由开场嗌到完场。期间有歌迷向住轩仔大叫：“你好靓仔呀！”轩仔笑住话：“多谢你哋日行一善。”全场爆笑。另外，佢又透露已经录紧全新国语碟，歌曲一半原创、一半翻唱，歌迷表示期待。

两小时嘅演唱会中，轩仔施展混身解数表演，不过原来佢抵埗马来西亚就病咗，佢喺台上话：“呢件事我觉得实在太奇妙！所以想同大家分享。我落机时突然间觉得喉咙痛痛哋，第二朝瞓醒就冇咗把声，喺酒店房好徬徨，因为作为一个歌手冇咗把声，而第二晚就要开show，冇声点算呢？”佢话主办单位好贴心，摆咗暖水等各种“医疗设备”喺佢房，“我都不断祈祷，今晚开得番声唱歌。当然好大部份力量系嚟自你哋（观众），谢谢大家！”

第一次encore后，轩仔上台唱出《断点》、《Hurt So Bad》、《只是太爱你》及《余震》等经典歌曲，唱完《My Way》后，演唱会结束，不过场馆虽然爆灯，但一众歌迷依然唔肯走继续大叫encore，于是轩仔再次出场，唱出《爱情无关是非》及《烟雨斜阳》，两次encore后演唱会圆满结束。