【向西闻记】与赵永洪楼梯激战　牛杂妹不抗拒一夜情：why not？

继《反黑》之后、再有港产电视剧于Netflix上架，12集《向西闻记》前晚举行首播礼后，呢日轮到由赵永洪及李美琪（牛杂妹）主演嘅新单元《食女性地嘉亨湾》宣传。戏中赵永洪饰演一个时薪38 蚊嘅保安员，搭上豪放港女牛杂妹，仲去到后楼梯大战连场。

向来乖巧嘅牛杂妹首次扮演豪放女，可谓耳目一新：“好开心今次导演咁大胆揾我做一个豪放女，令人睇到㷫烚烚，后楼梯𠮶场戏，我拍嘅时候好紧张，因为戏入面我要主动锡赵永洪，手部游走佢身体不同部位，好怕唔小心掂到佢，俾佢以为我想非礼佢，哈哈。但经过导演亲身指导示范，加上对手嘅配合，场戏总算有惊无险顺利完成。”提到一夜情速食文化，牛杂妹就话：“我唔特别赞成或者反对呢件事嘅发生，爱情上我系几典型嘅水瓶座，非常凭感觉，如果感觉到而大家都系单身，why not？”

戏中赵永洪拉牛杂妹去后楼梯激战，佢话角色反映现今年代嘅“饮食文化”，但拍呢场激战戏绝不好受：“拍𠮶时又热又局，但演员有呢个好处，正常你唔会做嘅嘢，演戏就有机会俾你感受吓，其实都几鬼惊，宁愿上番床好过。”现今唔少男人靠把口呃女上床，赵永洪则觉得此风不可长：“真的假不了，假的真不了，大话始终系大话，有一日会穿，呃人唔好做呀。依家网络资讯太泛滥，要自己分清楚边啲系真同假，如果唔系都好大镬。”