【法证先锋II】蔡康年曾演连环杀手　转型讲财经︰监制唔畀我再做

香港人习惯晚睡，所以TVB午夜时段的档期都吸引了一班粉丝晚晚坐定定收看，除了早前网民热烈讨论的经典处境喜剧《卡拉屋企》外，还有现在热播的《法证先锋》系列，当中翻看不少当时熟悉的演员面孔，真的好有亲切感，就好似剧集中的由蔡康年饰演的连环杀手张耀忠。

早前就播完《法证先锋》第一辑，依家就播到第二辑。《法证先锋II》由欧阳震华﹑林文龙﹑郑家颖﹑佘诗曼﹑蒙嘉慧和钟嘉欣主演，由不同的个案串连，由主角带领大家去破解悬案。在播完的“连环杀手案”，由蔡康年饰演的杀手就引起大家的注意。他因为在半年间痛失妻女而患上创伤后压力心理障碍症（PTSD），所以杀死了他认为故意先救一个残疾女童而令他的女儿失救而死的消防员何广福﹑残疾少女李美琪和黄妙嫦，手法凶残。

不过当中蔡康年的演绎方式就引起了大家都注意，被警察捉拿归案后的张耀忠和盘托出，不过网友就大呼他的独白“语气劲好笑”﹑“把声好笑”和“好似读紧潮文咁”，当中更爆出金句“人哋个女就食雪糕，我个女就食元宝蜡烛香咋。”肉紧程度满分，仲有点诙谐感觉，令紧张的剧情缓和不少。《香港01》记者致电蔡康年访问，他说都收到好多朋友发短讯更send相跟他说重播到有他的戏份，他记得当年要拍《法证先锋II》时，都几辛苦，“因为𠮶时要去好多唔同嘅地方拍外景，比如俾佘诗曼捉嘅，系一日外景，走去发型屋嘅，又第二日外景，跟住见到有个坐轮椅嘅女仔俾人踢低嘅，又第三日外景，差唔多拍咗6﹑7日嘅外景先至变成𠮶半个钟头嘅剧集。”

其实蔡康年就话只做过两次连环杀手的角色，除了《法证先锋II》外，就是令人印象深刻于2004年播出的《陀枪师姐IV》中，饰演有多重人格的连环杀手陈志聪，当中，“大B哥哥”和“奀仔”等人格真的睇完令人毛骨悚然，眼神和神情入型入格。所以他演的虽然常常都只是其中之一个单元的角色，但他有个人特色的演绎，都让角色劲“抢戏”，仲令人记得添！不过蔡康年向《香港01》记者透露，当年做这个角色时都好大压力，“𠮶时我拍完之后，我自己都承受唔到拍摄个压力，成日都惊自己做得唔似，曾经喺导演面前喊过，觉得‘死啦，今次真系做得唔系几好㖞，次次都争啲啲咁样’，最后不停咁尝试，后来出嚟当时嘅效果OK咁。同埋依家有时都记得嘅话，证明系大家一个团队嘅努力，𠮶次导演都不停鼓励我，同我讲‘你得嘅，你尽量去试吓啦’。我记得拍一场戏𠮶时要扮细路仔，之后又突然变返个杀手呢，系同一日里面发生，个人都变嚟变去，好似要记好多唔同嘅嘢咁样啰。”

对于虽然只做过两次杀手的角色，但却非常深入民心，蔡康年会否不想别人只记得他这方面的演出？他说笑言不介意︰“总之做过嘅嘢有人记得都系好事，前辈教落︰‘你做咗嘅嘢，如果冇人知道，或者冇人提，系你嘅失败’，无论系赞系闹，都系令大家记得咗你嘅话，如果赞你嘅，咪睇吓有边度可以再做得好啲，如果闹你嘅，你就知道一定有嘢做得唔好，咪再努力再做返，改变自己，行返一条啱嘅路啰。”角色有人记得是好事，原来直到现在都有人会叫他做“大B哥哥”，他说︰“到依家好多都系啲廿零岁大学生，或者啱啱出嚟做嘢，佢哋都同我讲‘我细细个就睇你㗎啦’，跟住就走嚟讲几句‘大B哥哥’咁样，变成大家嘅集体回忆嘅其中一样嘢，我都开心嘅！”

近年蔡康年就较少拍剧，反而转型成财经节目主持，近年做过财经节目《创富坊》主持，现在就在TVB财经资讯台做节目，主持《法证攻防》和《通悉牛熊》等节目，另外，都有帮大型晚宴或慈善团体等等做MC。而即使有拍剧，后来蔡康年的戏路就转为演专业人士如医生的角色，原来是因为财经节目监制要求，他指︰“近年都系少拍剧，主要做财经主持同MC，剧集𠮶度呢，因为𠮶时我哋财经节目𠮶边嘅监制就要求我唔可以再拍啲变态杀手嘅戏，所以就唔会再做呢啲角色，已经成为过去。因为佢哋担心夜晚先睇完你做变态杀手杀完人，第二朝早你讲恒生指数升跌，唔会有人信你㗎，所以佢都希望我就算做啲剧集嘅角色，都净系做啲所谓嘅专业人士啲嘅角色，比如话医生﹑律师，咁𠮶啲就另一个挑战，可能啲台词比较长，比较难背。财经监制𠮶边就唔畀我做再做变态杀手嘅角色，讲明㗎，‘如果你做变态杀手就唔好做财经主持，做财经主持你就唔好做变态杀手’。”所以看来都较少会睇到他好似以前一样令人惊喜的演出了！