吴彦祖发线升至新高点　M字额加白发令人感叹岁月不饶人

早前吴彦祖返港，孖住20年前《特警新人类》嘅拍档谢霆锋、冯德伦和李璨琛，担任第38届香港电影金像奖颁奖礼“最佳视觉效果”颁奖嘉宾，勾起唔少观众嘅回忆，大家都盛赞颁奖台上嘅Daniel依旧靓仔，但舞台下嘅佢其实相当随性，最近有网友喺美国偶遇并上载合照，令人惊觉男神都有崩坏嘅一日，不胜唏嘘。

有网友24号于网上表示，自己喺美国一间餐厅食饭，见到Daniel喺门口张望但因为满座而准备离开，网友同朋友冲上前要求合照，Daniel亦友善地答应。非工作时间Daniel以街坊look示人，身穿白色卡通tee，右手拎住纸盒，笑容依旧杀死人。

不过睇到张相，大家都不禁被Daniel五官再对上嘅发线吸引视线，44岁嘅Daniel早已有脱发问题，呢日嘅合照更惊觉发际线再上升，几近到头顶位置，而且仲有唔少白头发，令网友慨叹再靓仔嘅男神都有carry唔到嘅发型。