【古巨基演唱会】张智霖爆早入行大叫前辈　笑称：由细听你啲歌大

古巨基世界巡回演唱会呢晚嚟到尾场，唐诗咏，苏志威，向海岚，傅明宪，曾乐彤，许靖韵，姚莹莹等都有到场支持。身为嘉宾嘅Chilam张智霖罕有著上大红花碌碌西装上台，连基仔都感到惊讶：“哗，你著到咁靓仔呀你！”Chilam坦言自己一向都是黑白灰，但为咗衬返基仔，要开心要缤纷，结果破例拣件花碌碌。Chilam又话：“刚听你讲野，我先知原来你系我前辈㖞，你重早我入行一年。我由细听你啲歌大啦，前辈。”

二人合唱《现代爱情故事》之后，基仔话印象中Chilam系一个24小时都靓仔嘅人，最近呢两年玩得埋咗成日见面，发觉佢唔止系一个靓仔咁简单，重系一个开心果，经常带比大家好多欢乐：“Chilam仲系一个好锡老婆嘅人。我同佢有一啲地方真系好似。我记得有一次Chilam嚟我屋企玩，工人姐姐拎雪糕出嚟，佢静鸡鸡行去拿左雪糕之后，就突然听到阿靓好大声好恶咁大叫：张智霖！你唔好食啦你！”Chilam听到就笑住话：“系呀，你咪同我一样，古巨基其实都系一个饥民！都系成日冇野食架！”

去到尾声时，基仔唱完encore完歌迷都唔肯离场，不停大叫encore再encore，结果基仔再次出台，令观众开心到飞起。基仔手持手提电话出来，先是满足歌迷需要，清唱《苦浪漫》及《幸福方舟》，继而零全场一齐大合唱《情歌王》作结。结果被罚钱都继续唱落去，最终唱到十二点先真正完结。