张卫健自爆结过三次婚：如果唔系信仰，我感情比韦小宝更复杂混乱
张卫健昨日去到跑马地圣玛加利大堂，与过百名天主教徒分享信仰喺佢人生路上嘅种种事迹。分享会一开始，张卫健提到“如果我唔系信仰，我可能比大闹天宫时期的孙悟空更失控、我亦有可能比韦小宝嘅感情世界更复杂混乱、我甚至系个唔负责任嘅男人……”但正正系因为信仰，令他能够克服种种的诱惑。
提到弟弟张卫彝（Henry）去年初暴毙时，张卫健原来正身处泰国渡假，喺赶返香港途中，最令佢感到烦恼嘅系唔知点将弟弟嘅死讯同妈妈讲。“到底应该系话Henry死咗？Henry过咗身？定系Henry走咗？发现我一生人写咗好多剧本、创作咗好多对白，但呢一句，就系短短嘅说话，我谂咗好耐都谂唔到应该点样讲。喺飞机上，太太话‘不如同妈妈讲Henry返咗天主身边啦’。”虽然张卫健认为已经有了最好的说话，但他到达妈妈屋企门口、准备揿门钟时，依然系紧张到不得了。“呢世人未试过咁紧张，出过好多大骚或现场直播都未试过咁紧张，系因为唔知阿妈有咩反应，佢会唔会突然爆血管等等………但同阿妈讲Henry返咗天主身边后，佢好平静，我以为佢系强装，但数日后，佢真系咁平静，真系接受晒我嘅说话，冇因为白头人送黑头人而过度伤心。”
分享会上，张卫健又自爆结过三次婚。他笑言第一次是在十多年前，由于当时仍有偶像包袱，所以就同太太张茜偷偷喺南京注册。但若干年后，总系觉得欠一个喺教堂内举行的婚礼，而刚好老婆系菲律宾旅游大使，当地旅发局提议可在世界遗产之一嘅圣奥古斯丁教堂（San Agustin Church）举行婚礼，于是他请了香港的一众好友飞去当地。“点知出发前5日，教堂话太太唔系天主教徒，所以唔理，仲提议我哋喺香港举行婚礼，大佬我请晒朋友咁点搞？最终佢哋系话可以借出教堂，但就唔会提供神父，成件事真系做戏咁做。完咗呢埸戏之后，又系若干年后，都仲系有少少耿耿于怀，修女提议喺香港办一个正式的婚礼，于是我就同埋老婆、阿妈、神父同埋修女5个人完成第三次婚礼。”
我最撑男主角竞争激烈，“逆流大叔吴镇宇”VS“沦落人黄秋生”，快啲把握手上一票，拣心水影帝啦！