【多图】马德钟乖仔马在骧签邵氏　马神认入行：可能一齐拍广告

拥有艺人父母优良DNA，星二代无论外形定演艺才能都比一般人有优势。马德钟囝囝马在骧（Xiang）早几年仲读紧中学时，高挑身形阳光外表，泳术高超曾获多面奖牌，仲识多种乐器，早已被网友睇好系男神接班人。呢日喺娱乐公司网页忽然发现Xiang艺员资料，马德钟接受《香港01》访问时表示：“系呀囝囝同我一样签咗俾邵氏。”

现年20岁嘅马在骧（Xiang），现正于澳大利亚修读机械工程二年级，马德钟夫妇每次被问到囝囝会唔会入行，都表示要佢读完书再决定。Xiang仲有2年几先毕业，但依家已经签约，唔通计划有变？马德钟接受《香港01》访问时表示：“哈哈哈其实签约都系呢几个月嘅事，主要因为好多工作打俾我去接洽佢，但我自己真系无咁多时间去处理，我去倾又唔知点咁，所以咪交埋俾邵氏处理啰。”

其实Xiang 19岁时为Hermès到法国献出处男catwalk show，亮丽外形加上毫不怯场，外界早已睇好佢迟早步爸爸后尘入娱乐圈，马德钟表示：“（嚟紧囝囝会拍戏定做MODEL?）真系未有大方向，呢一刻佢都系读书为先。（会唔会父子合作呀？）之前有一齐帮澳门时装周影咗辑相，如果对手戏呀？可能一齐拍广告比较有机会。我谂佢对电视电影都有啲兴趣，但最终对幕前定幕后边个范畴最有兴趣，因为音乐方面都好有兴趣，小提琴钢琴结他都有玩开，最终想向边方面发展，就真系要等佢读完书自己再决定。”