【锋味】谢霆锋欧洲旅行遇骗案　举中指应对甩身：好在我跑得快

去欧洲旅行听落好写意，但亦有好多人都话当地治安麻麻，不时有抢劫同骗案。呢日谢霆锋分享同吴彦祖去希腊取景拍摄《锋味》趣事时，被刘翁问到：“唔知你哋有无试过，欧洲会有人叫你Give me your finger，如果你真系俾咗只Finger佢，佢就会捉实你只手指不断挢圈，跟住问你攞钱。”霆锋就话自己都遇过呢种情况，然后佢就举出中指，搞到火火同刘翁即刻爆笑问：“你走得甩咩？”霆锋笑住答：“我跑得快。”

呢集《锋味前奏》霆锋就教大家整沙律，当霆锋一话要用黄芽白整沙律，火火同刘翁即刻露出嫌弃神情话：“黄芽白可以做沙律嘅咩？”霆锋解释呢道菜其实系由吴彦祖教佢整，火火即刻回应：“佢晓唔晓㗎？咪乱咁嚟啊！黄芽白攞嚟打边炉㗎嘛！”又质疑生食黄芽白会有腥味，但当霆锋完成沙律，佢哋两个都抢住食，刘翁仲忍唔住话：“哇！得！”霆锋仲帮佢改咗个名，叫：“吴彦祖黄芽白沙律”。