【晚吹】男学生劲进击　钢琴女Miss：喺奶奶面前约我睇戏

ViuTV节目《晚吹─又要威又要戴头盔》每集都会揾嚟唔同行业嘅人士，分享工作时嘅所见所闻。最新一集揾嚟5位钢琴教师，由学生讲到家长。其中一位老师话自己曾经遇过学生吐口水落琴，亦有老师遇过一个学生好钟意踢嘢，结果落堂时，老师成对脚都被踢到瘀晒，亦有老师遇过每次上堂都会去洗手间嘅学生。“试过厕所塞咗，结果泵出一大堆糖纸，个小朋友唔食得糖，我即时影相send比小朋友爸爸睇。”

除此之外，亦有老师遇过男学生劲怕羞，一掂就有反应：“当捉住对方手腕时，佢耳同面都红晒，结果我唯有用间尺嚟接触佢。”不过，最好笑系其中一位女老师表示，曾经有男学生到其家中学琴，借啲易想约睇戏：“佢喺我奶奶面前话‘你个女好叻’我奶奶即时同佢讲‘佢系我新抱嚟架’”亦有另一位女教师指，曾经有遇上男学生，无论佢坐边，对方就跟著移动，最后仲话：“我真系好想坐近你。”

女老师都咁多“艳遇”，男老师又点呢？化名阿T嘅男老师就话试过深夜收到家长嘅讯息，内容大致系话“我小朋友好钟意你教”由于夜已深，所以一句多谢之后，就同家长讲要休息，但对方并未有理会，不停讯息之余，其中一句系：“其实我都好需要你”真系大胆又直接，最后阿T同请对方自重，并提醒佢已经有家庭，睇嚟识乐器嘅男人真系份外吸引。

节目中，有老师透露曾经教过一位艺人嘅小朋友，对方仲话“几多钱都无问题，最紧要一定考到八级。”点知，当老师去到艺人屋企时，发行原来得部电子琴，老师即时向对方反映，指电子弹学唔到古典音乐，但艺人就话一钢琴会破坏屋企设计，所以唔会换，到最后，呢位老师因为顶唔顺电子琴而无再教落去，但到底呢位艺人系边个呢？老师就好口密，点都无讲。