【早霸王】男听众患病自觉废人闹走老婆　森美：唔好太过自责

最新一集《早霸王》嘅“你知道唔知道有人挂住你”，男听众阿兴表示想透过节目多谢老婆嘅照顾，之不过，阿兴原来同老婆已经分居一年多。“拍拖年半有咗BB就结婚，之后自己发生工业意外，脾气变得好差，成日都好忟，所以闹走咗佢。”阿兴表示发生意外后，由于又患上另一种病，所以成日都好担心自己会早死，照顾唔到老婆同个女，但另一边厢，又觉得自己成日要留喺屋企休息似废人。“不过我而家已经有返工作能力，由低做起。”

阿兴表示太太系喺佢康复后搬走，森美指呢种情况系外国甚为普遍，有调查显示系因为负责照顾嘅一方感到心力交瘁，当完成任务后，自然会想离去，唔想再停留喺阴影地带。森美尝试安抚阿兴：“你都要明白佢心理压力好大，我讲头先嘅例子系唔想你觉得内疚、唔好自责，因为当中有好多外来因素，你控制唔到自己闹佢，我哋系明嘅，就算唔成功，错不在你，你要正面咁谂，咁样对小朋友系最好。”阿兴透露太太搬走前夕成日都出夜街，令佢遭到屋企人指责“冇人照顾个女”，最后阿兴致电对方要求离婚。

提到三岁爱女喺学校曾因为“人人都有妈妈”而大喊时，阿兴情绪亦十分激动。身为人父嘅森美就劝阿兴要尝试令小朋友明白发生什么事，并指阿兴既然都可以喺工作上由低做起，冇理由会搞唔掂小朋友。“小朋友紧要过同太太嘅关系，太太唔返嚟都好，小朋友一定要系第一位。”电话接通阿兴老婆迪迪，虽然迪迪话估到系边个挂住自己，但答案竟然系“男朋友”！森美同小仪虽然有一秒呆咗，但都好专业咁关心下迪迪嘅感情状况，原来迪迪同男友拍拖半年多，而且都几开心……讲到呢度，森美都唔知点接落去好，而迪迪亦都feel到唔对路，仲问森美︰“吓？即系唔系我男友打嚟？”

由于估唔中边个挂住自己，所以森美未有接通双方嘅通话。再次同阿兴交谈时，森美感觉都有少少沉重，仲话“唔系个个星期都有开心故事”，告之迪迪有恋情后，阿兴表示︰“有听闻，但唔确定。”事情发展至咁嘅地步，森美唯有安慰阿兴谂下之后要点做，并叮嘱佢“小朋友系最紧要”。