森美惨遭女儿当众拒合照“食柠檬”：好似俾前世情人飞咗

森美不单是伶牙俐齿的主持人，而且还是个廿四孝爸爸，落力赚钱为一对子女供书教学，相信仔女都感受到森美的爱。森美昨日（24/2）出席一个公开活动，女儿曦童亦以去年活动得奖者身分登场，虽然两父女罕有同场，不过女儿却拒绝与森美合照，令森美颇为“瘀皮”，又在Instagram笑言是“失恋的感觉呀”、“享受过初恋就要付出代价”。

森美今日接受《香港01》电话访问时透露，早于参与活动前已经两度询问女儿能否一同合照，惟皆被女儿拒绝，所以已经有心理准备。森美又指自己和女儿没有如过往一样亲密，所以有种失恋的感觉：“以前我出门口嘅时候，佢会跳上嚟揽实我锡我一啖，而家佢只会俾个侧边膊头我揽下，𠮶阵我有种失恋嘅感觉，好似俾前世情人抛弃咁，我都唔记得几时开始佢无锡我，好似系小学六年班初期开始，如果我知道𠮶下系最后一刻，一定会好好珍惜。”

惨被女儿抛弃的不只森美一个，连太太也“身受其害”：“佢拖住个女只手唔够十米，阿女就甩开佢只手，觉得自己好瘀；太太嘅时装触角都唔错，不过有次佢帮阿女喺日本拣衫，阿女就话：‘呢啲系大妈嘅衫’明明𠮶件系今季最新嘅衫嚟，所以话你谂系好嘅品牌，唔等于佢觉得系好嘢，可能我哋想要贵嘢，但佢只系想要街边货都唔定。”

对于女儿步入青春期，森美又有甚么对策？“希望自己接受到佢生命中唔一定要有你嘅事实，以前你管接管送，而家你要佢等十分钟都唔肯，证明你喺佢生命中开始毫不重要。我谂起我细个𠮶阵，夜晚食饭宁愿同朋友、女朋友，甚至同女朋友嘅屋企人食饭，都唔会同屋企人食，而家全香港家长都现眼报，谂起呢点大家都会锡番自己父母。”森美又奉劝各位家长将心比己，不要将自己想法强加于人。

另外，森美又提到女儿事后澄清无意在记者面前令自己“瘀皮”，只是不知道有记者记录当时场景。森美又形容女儿为人较低调，现时都不太愿意和自己接受访问，不过问到女儿是否无意加入娱乐圈，森美就表示：“佢可能唔想靠我嚟上报，佢靠自己上报可能又OK，佢或者想用自己形象展现俾大家睇，而唔系喺我嘅护荫下出名。”森美笑言过往女儿曾提出想做DJ，森美要求对方要考到医科或其他神科才能闯娱圈，但现在最重要是子女乐在其中，自己对子女的职业就无所谓。