【锋味】谢霆锋介绍新女友俾周杰伦认识：未有人见过

历时三个月，今季《锋味》日前播出最后一集，压轴嘉宾就系同霆锋喺六年前，拍摄电影《逆战》饰演两兄弟嘅周杰伦，今次佢哋喺东京上演《逆战》续集，周杰伦化身导演，节目一开始，就嚟一场“兄弟重逢”嘅戏份，周杰伦系咁嗌cut，跑到霆锋上气唔接下气，相当搞笑。除咗整蛊霆锋，既然系最后一集，周杰伦讲到明今次要霆锋带佢去“没有吃过的”美食，实行要俾啲难度佢咁话。

喺霆锋安排下，佢哋去品尝由九十三岁、有“寿司之神”之称小野二郎所整嘅寿司。小野二郎系日本地位最高嘅厨师，“寿司之神”称号闻名全球。佢嘅寿司店，连续两年获评“米芝莲三星”殊荣。食过“没有吃过的”美食后，霆锋就话介绍自己嘅“新女友”俾周杰伦识，去到band房，周杰伦就知道原来新女友就系新结他，佢即刻问：“有没有人看过？先讲！”霆锋话冇，然后周杰伦就说出重点来：“这个很重要，昨天也是吃没有人吃过的，我就要跟其他来宾不一样。”打开结他盒，一睇到结他身系一个女神雕像，周杰伦忍唔住话：“这个太夸张了吧。”霆锋一边拎出结他一边讲：“这个师傅做了三年，没有怎么出过房间门口，一直雕这个东西。我们都是希望给观众带来最想像不到的经历嘛。”

之后霆锋就话听讲周杰伦识得用食物玩音乐，然后就拎苹果香蕉同菠萝出嚟俾周杰伦弹琴，佢用香蕉弹《青花瓷》，霆锋拍晒手咁话：“好一首《香蕉瓷》。”弹完后，周杰伦沾沾自喜咁话：“可以来个难一点吗？这个太简单了。”然后用菠萝弹出霆锋嘅歌曲《旧伤口》，听到霆锋都忍唔住唱番两句。而同样系结他迷嘅日本留学生青空，为咗学好音乐，离乡别井去到东京，为咗鼓励青空勇敢追梦，霆锋同经理人霍汶希为佢整咗一道创意十足嘅冰箱料理；而周杰伦则录咗一段暖心video送俾佢，真系睇到人好感动。