【情人节】李彩华宣布已成人妻：下跪求婚𠮶一刻只识得狂笑

2月14日情人节，有恋人嘅都纷纷喺网上放闪，晒花晒礼物晒大餐，都不及Rain李彩华咁绝 --- 宣布结婚已成人妻﹗刚刚先有传媒影到佢同6呎型男Eric喺街头甜蜜拍拖，诡不避嫌喂对方食嘢，转个头Rain就喺微博自爆，唔系公开恋情而系直情宣布己成黄太太，真系恭喜晒呀﹗

Rain喺情人节下午于微博留言：“Rain + Eric = Mr & Mrs Huang”唔声唔声原来已成人妻﹗虽然并无贴出老公嘅相片，以二人卡通画像Key上希腊小白屋背景，而另一张相就晒出佢地嘅利是封，上面写住Mrs Huang Rain，睇嚟Rain对人妻身份相当受落。而黄生黄太嘅婚纱照亦随即曝光，见到佢地喺露台前情深对望，眼神流露无限爱意。Rain分别著上一件心型胸A Line，以及一件鱼尾婚纱，头发简单放落嚟，非常脱俗。

Rain接受访问时仲系难掩兴奋心情，佢话：“上年11月生日时，我喺北京拍紧剧，佢夹埋我嘅助手及演员朋友们，收工一返到房就见到佢准备嘅花同埋汽球，然后下跪求婚。以前幻想会喊呀感动，但自己𠮶一刻只识得狂笑，其实我都有少少估到，之前两个人都有倾过下。希望年底补摆酒，因为我仲有两套剧要拍，唔想好赶急去做，会等有时间先再去慢慢筹备。”据知Rain今个月刚刚喺内地正式领证结婚，同丈夫Eric相识多年但半年前先开始拍拖。

现年35岁嘅Rain 十七岁时入行，以清纯形象成为时下少男梦中情人。01年同林峰合作电影《别恋》擦出爱火，可惜恋情无疾而终。之后佢又同几位圈外男士拍拖，可惜都系分手收场。2015年同何远恒相恋，但去年宣布因婚姻理念不能达到共识分手。最适合嘅一位原来早在身边，Rain喺对的时间遇上对的人，情人节宣布成为人妻，相信大家都会为佢感到高兴。