曾乐彤初登纽约时装周　偶遇木村光希言谈甚欢

英皇歌手曾乐彤受品牌邀请，于美国时间（12日）参加“New York Fashion Show”，同场出席嘅仲有“紫天椒”Chloe Grace Moretz、《Black Panther》男星Michael B. Jordan、波多黎各名模Joan Smalls、日本男星木村拓哉细女木村光希、台湾男艺人王阳明、周杰伦太太昆凌同埋香港艺人文咏珊。

第一次参加fashion week，同场仲有咁多时尚界嘅代表人物，曾乐彤话好荣幸、好兴奋。平时佢亦会留意大大小小嘅fashion show，对自己嘅穿衣配搭亦甚有个人风格，今次纽约时装周佢仲带咗个空嘅旅行箱，准备扫货，“几日前已经嚟咗，都有少少收获。”

除咗兴奋，出发前曾乐彤就变得紧张起嚟：“早几日天气好好，冇落雨冇落雪。但今朝一起身就落大雨、大雪，而我今日件衫系透视、好薄，所以今日系喺好冻嘅情况之下出发，全身可以黐暖包嘅地方都黐咗，但因为套衫太薄，唯有喺高踭鞋里面黐暖包，哈哈。”为咗可以靓靓咁出席fashion show，曾乐彤朝早七点就起身：“我哋系要十二点出发，但惊自己水肿，所以七点就起咗身。”

见到“最强星二代”木村光希，曾乐彤第一个感觉就系高：“佢真系好高。有同佢闲聊咗几句，我有简单介绍自己系香港歌手，同埋系第一次去fashion week。佢好nice、都有介绍佢自己，同埋我都有同佢妈妈工藤静香合照。”除此之外，同场嘅Janice（文咏珊）都有传授经验俾佢：“因为我太紧张啦，哈哈，Janice就同我讲第一次会系咁，之后嚟多几次，有经验就会好好多。”