【开心速递】康华被隆重招“回家”：病到试唔到造型以为冇得拍！

《爱·回家之开心速递》添食加拍至720集，而剧组亦宣布将会陆续加入杨玉梅、彭怀安（Eddie）等人，而Madam Lo卢宛茵亦已喺年初三播出一集以客串形式登场。而喺昨晚一集，康华亦以熊树仁（单立文）嘅前女友张慧仪身份出现剧集，并追问其女儿嘅下落，过程被红衫鱼、安仔以及若水目睹。由于红衫鱼嘅生活习性与熊树仁十分相似，再加上张慧仪（康华）对红衫鱼表明自己系妈妈嘅身份，令红衫鱼一时间难以接受。

“亲生妈妈突然现身揾女”向来都系大台剧集例必会出现嘅剧集，有网民更指剧情发展落去，随时会系母女相认后齐齐离港，康华接受电话访问时就话暂时未知剧集发展系点，但就大赞该剧监制诚意可加，唔排除之后会继续“回家”。“因为我之前同时拍紧《黄金有罪》、《法证先锋IV》同埋《飞虎》，根本好难度期，但监制话可以迁就我时间，真系唔知点解佢哋一定要揾我，但都好开心。原先去试造型𠮶日，我因为打咗流感针又疴又呕，结果去唔到，以为都无得拍，点知后尾剧组话再度期去试，真系好有诚意。”
 

康华入行多年，虽然拍过唔少剧集，但原来处境剧集乃第一次。“自己都想再拍，因为𠮶日好轻松，几个钟就搞掂我嘅戏份，可惜当时因为有几剧在身，所以唔可以留底同其他人好好交流。”康华指昨晚登场后，收到不少粉丝以及朋友的留言，令她决心拍毕《飞虎之雷霆极战》后，要好好揾《爱·回家之开心速递》嘅监制商讨“回家”事宜。