陈凯琳越南Resort享受Babymoon　纤瘦背影完美隐藏巨肚

对于大肚婆有好多都市传说，唔可以蹲低唔可以揼钉，出远门更加谂都唔使谂。时代唔同啦，好多传统嘢大家都未必跟足，只要陀得稳阵，问过医生身体情况许可，唔少妈妈都会大住肚去Babymoon。陈凯琳去年11月宣布怀孕后，继续工作之余亦不忘享受人生，呢几日又飞到越南度假，仲大晒巨肚添。

早前已经有人撞到郑嘉颖带Grace到越南芽庄旅行，睇嚟Grace真系好钟意越南呢个地方，新年期间又去咗越南Resort啦。Grace喺1月中出席活动时，已经透露自己怀孕后重咗超过20磅，见到佢其中一张相只有背影，其实睇落仲系好纤瘦呀﹗

点知转个侧面就感觉大逆转啦，Grace著住件松身灰色上衣，加黑色贴身裤，见到孕肚明显隆起，即使素颜都显得气息相当好。Grace留言话：“When he tells you he loves your pregnancy glow.”虽然相片未见老公郑嘉颖身影，但呢句说话无疑出自爱人口中，先会令Grace咁冧啦。