何超莲开餐厅落手落脚收银送餐　分享择偶条件：我有个独特癖好

“我觉得20岁至30岁，这十年对于女人非常重要，要好好为事业打拚。所以我不会浪费时间在吃喝玩乐，或者拍拖上。”呢番说话出自有“最索千金”美誉嘅何超莲，佢既系慈善机构创办人，亦系牛肉面店老板娘。日前超莲接受香港开电视主持植咏珊（Cathy）访问，分享佢作为90后嘅营商之道，仲罕有分享感情观兼择偶条件，单身男士要注意啦﹗

超莲于去年开设牛肉面店，绝非只系出钱出样宣传，只要佢一有时间，就会亲身到铺头打点，收银落单送餐等都亲力亲为，非常勤力。佢坦言在开业初期都遇到不少困难：“起初请返嚟嘅店长唔太老实，令到帐目出现混乱。𠮶次之后我就更加小心；幸好自己都有啲饮食业界朋友，俾咗唔少意见同支持。”超莲又笑言自己并无“老板娘款”，又直言管理之道深受爸爸何鸿燊博士影响：“员工系好重要嘅元素，呢样嘢爸爸由细就教我。佢话就算系手抱婴儿都要称呼佢做‘阿哥’；作为老板，亦一定要尊重员工。”

超莲身体力行话俾大家知佢绝非离地千金小姐，除咗事业，外界少不免关注佢嘅感情状况。睇住好姐妹邓紫棋、李蕴都有好归宿，超莲呢次亦罕有分享择偶条件：“我系个爱恨分明嘅人，钟意就钟意。唔系可以慢慢培养感情𠮶种女仔。同埋我有个独特癖好，就系钟意手指靓嘅男仔！”一讲完佢自己就哈哈大笑，仲透露每当身边好友见到拥有靓手指嘅男仔，都会介绍俾佢认识，不过超莲就再强调现阶段都系事业为重。