俄仔Ansheles过年孤伶伶最唔开心：今年谂住摆档写挥春

18岁只身来港嘅“俄仔”Ansheles愈战愈勇，剧集综艺双线发展之余，最近仲同李拾壹合作出歌rap中文，新歌《麻麻哋Day》曲、词、编曲同监制都系由俄仔同李拾壹负责，歌词“今晚打风 听朝返工”、“我今次真系gg”贴地之余亦系唔少后生仔心声，唔少网民都大赞俄仔此举有惊喜。“写rap其实唔难，自己都无谂过咁快，反而唱歌部分花最多时间，教我嘅老师虽然好好，但我觉得佢好想杀死我。”

曾经话过自己唱歌非常唔掂嘅俄仔，今次勇敢地豁出去，佢话原本系打算同李拾壹合作拍片，但对方反过来鼓励他rap。“大家反应都唔错，亦都听得明我rap咩，之后应该都会继续，话唔定将来会出碟！”香港乐坛愈来愈热闹！其实除咗rap之外，俄仔今年亦会向设计方面埋手，谂头多多，难怪佢觉得自己升呢。

对于中文，俄仔其实只系识讲唔识睇／写，笑言中文程度如同三岁小朋友嘅佢，呢日请佢写贺年挥春如同希望工程一样，就连自己写紧嘅“猪笼入水”都唔明真正意思是什么，至于个个打工仔都会有嘅“初四咁嘅样”，佢更一度解读为“wrong die like this”同“坐到死”。留港5年，俄仔话每到农历新年都特别唔开心，因为无屋企人陪，直到之前有香港朋友邀请佢去拜年，佢先有“家”的感觉。“今年本来打算去上海，但朋友话好多铺都会休息，所以放弃，但留喺香港都唔知做咩好，可能写挥春拎去卖。”相个如果俄仔真系去开档写挥春的话，应该都会赚到笑。相睇俄仔到底系点“画”挥春，记住睇埋片。