前有线主播钟炜乔一入TVB即被考起：我发誓以后唔再讲虾有虾味！

曾经在有线电视担任5年主播的钟炜乔（阿Matt）最近加盟无线电视，同为主播的工作，只是换个咪牌，理论上性质非常类同，有过往的经验，阿Matt理应能够很快适应环境？但事实上，阿Matt最近就被工作考起！事源刚加入无线的阿Matt一个星期，就接到通告，与区永权、钟晴以及尤荫荫一起到顺德、潮汕拍摄新年节目《新春旅游行大运》，岂料自己表现得未如理想：“我最初以为自己都叫做有经验，但原来过到嚟好多嘢都要适应过。最过份系我自己以前成日笑人做饮食节目讲鸡有鸡味，但今次我发现自己讲咗‘虾有虾味’，原来真系会讲出口，所以我发誓以后唔再讲虾有虾味！”

钟炜乔请教前辈区永权

“有好多嘢系以前好少机会试到，”阿Matt说：“我拍咗今次呢个节目先发现，原来四个主持一齐真系好容易会叠声。以前我都无咁留意到呢件事，同做访问呀专访好唔同，好多嘢都要从新去适应。同埋有时摄影师哥哥会同我讲‘自己揾食’，先发现原来企位上真系好重要，唔好论自己出唔出到镜先，系只要我企得唔够好，个画面就会唔好睇。”当阿Matt发现自己表现未如理想，即时向同行的大前辈区永权请教，学识和练习如何在适当的时候发声：“其实真系唔容易，佢教我，即使有啲嘢谂到想即时讲都好，尽量唔好讲，因为咁会令到啲声音好乱，效果唔好。”阿Matt还希望在往后日子继续学习，令自己不再像今次感到遗憾。