崔碧珈1个月减15磅　上围不跌反升：基本上都系无限食

虽则话民以食为天，但减肥系女士们终生事业，又想食又想瘦真系好矛盾，所以各式各样减肥秘方都有好多人跃跃欲试。崔碧珈（Anita）去年惊现康城影展红地毡，之后仲接拍法国电影，呢段日子都留喺意大利西西里岛拍戏。大家都知欧洲人饮食多肉少菜高脂肪，咁嘅生活环境Anita居然一个月减去15磅﹗呢日佢就公开秘密餐单，女士们学嘢啦﹗

大啖食高脂肪食品
“我每日都系食同样嘅嘢，芝士和干火腿加黑啡，无做过任何运动竟然自然瘦咗15磅。”睇到Anita呢几句留言大家系咪好羡慕呢﹗呢啲唔系叫同人唔同命，原来一切都有根据，呢种叫做“生酮饮食法”：“要进食高脂肪、低蛋白质、超低碳水，高脂肪嘅意思系要食到大约75%以上，我自己就食到80-85%左右。要好嘅脂肪例如椰子油、牛油、橄榄油、动物脂肪等。因为要进食高脂肪而我又食唔到咁多嘢，所以每一日我都会饮椰子油沟黑咖啡，分量大概系两大匙羹椰子油加入一杯黑咖啡。其实可以食嘅生酮食物有好多，但系因为我系意大利拍戏所以食得比较简单，我每日除咗饮椰子油咖啡，仲会食牛油果、火腿和芝士基本上都系无限食，咖啡任饮。”

点击图辑睇下“生酮饮食法”可以食啲咩：

“上围无变细到”
减肥都唔使挨饿，仲唔使点做运动添。Anita呢日完成西西里岛拍摄，趁天气好，出发机场转去巴黎前跑步10公里，系佢呢一个月以嚟首次做运动。而且好多时女仔减肥瘦身上围都会缩水，但Anita完全无呢个情况，仲好似再升级添：“我平时唔系食咁多芝士，喺意大利我日日都食差唔多手掌大嘅芝士。我发现以前如果减肥控制饮食，胸部都会有缩小，但系食芝士，呢一个月除咗体脂有下降之外，上围无变细到，相对嚟讲就系升咗级﹗所以爱美女生可以试试啊﹗”虽然Anita觉得呢种减肥法好处多多，但佢都有提醒各位，进行任何减肥要留意自己身体状况呀。