李若彤评新版神雕 　“一千个人心中就有一千个小龙女”

“小龙女”李若彤今日出席长者慈善盆菜宴，提到家里过年时最喜欢打麻将，但自己技术欠佳，宁愿旁观，甚少亲自“参战”：“有时我会摸到一手好牌，但我唔识截糊呀，要揾人教我。因为我一直都学唔识打麻将嘅章法，所以我啲朋友玩咗两局后就话：‘唔同你玩喇！’”

早前李若彤再次以小龙女扮相录影内地节目，仙气“姑姑”重现眼前。李若彤亦对自己的造型甚为满意：“我用惯同一个梳头造型师，个发型几乎系同无线一样，有90%相似，再配合埋套服装，我就好似小龙女上身咁，一动一静就自然好似小龙女。”另外内地已确实开拍新一版《神雕侠侣》，但由新人毛晓慧饰演的小龙女定妆照一出，网友就弹多过赞，指与前几代小龙女相比好像新不如旧。身为95年小龙女李若彤亦有听闻，她就为后辈平反：“其实一千个人心入面就有一千个唔同嘅小龙女，只要你揾到喜欢𠮶个就得架喇。我成日都同身边啲朋友讲‘唔好批评’，因为每一个演员都会好尽力去做一件事情一份工作，应该要予以支持。尽管佢未必系你心目中嘅小龙女，但都唔好批评，应该要多啲鼓励。”

李若彤又提到当年也有人拿她和陈玉莲 (83年小龙女) 比较：“其实咁样比对我地都唔公平，只不过当年我傻更更无谂咁多，只系想做好自己。总之每个人嘅第一印象一定系最深刻，你睇完自己个年代嘅小龙女再睇返后来嘅新版本，你一定会话‘我都系钟意之前𠮶个多啲’。但咁唔代表我地可以扼杀后起之秀，最起码应该要互相尊重。”姑姑不愧是姑姑，字里行间都渗着侠气！