【荷里活有个大老千】BabyJohn唔钟意呃人：我演戏时嘅情感都系真

由王晶监制的无线剧集《荷里活有个大老千》已经播出了10集，外界反应不俗，在剧中饰演舒奇一角的蔡瀚亿 (BabyJohn) 占戏颇重，他与吴业坤 (坤哥) 在戏中是一对“沙煲兄弟”，演得自然又有默契，两人一场为争冲凉而剥光猪肉搏的戏份十分搞笑。BabyJohn表示如果以除衫的尺度来计，这场戏是他从影以来最大胆的一次，不过拍摄时并没有感到尴尬。他说：“大家都系男人，而且𠮶个年代啲人真系会咁样，好反映到当时个社会嘅真实情况。”

原来有另一场戏先真正令BabyJohn感到尴尬：“讲我哋要孖舖瞓喺床上，大家尖头对脚咁样瞓，好迫，我哋个头同对脚系近到几乎系食到对方啲脚趾。拍呢场戏之前我哋拍完一场赤脚走火警戏，对脚好污糟，好多泥，喺床上大家真系啜到对方啲脚趾咁滞，所以好尴尬。”至于日后如果再有更大胆裸露尺度的戏要他牺牲色相，他又会否接拍？BabyJohn说：“到时先算，会谂下个动机点解要咁做？就好似讲粗口咁，到底系为讲而讲定系为剧情需要？要睇下有无必要同埋讲唔讲得通，说唔说服到我。”

他又好感激Kent哥郑则仕对他的教导，两人在剧中情同父子，在现实生活中则亦师亦友，已视对方为他的老师：“Kent哥教咗我好多嘢，有新嘅演绎方法，我依家仲系试验式咁应用紧。我好欣赏佢，会用老师去形容佢，佢系我喺呢个圈入面认识嘅前辈当中，关系最亲密嘅。佢拍戏时好认真但唔恶嘅，系为我哋好，对我哋每一个演员都好上心，会提点住我哋。”

Kent哥会直指出他们有甚么需要改过的地方，BabyJohn坦言一开始并不好受：“唔好受唔系因为畀Kent哥话，而系我准备好晒，但发现原来唔系咁嘅，会好疑惑。我系一个几受教嘅人，愿意放低自己𠮶套去跟佢𠮶套，我想喺演戏方面有突破。”

由于BabyJohn属萧定一公司旗下艺人，他的老板与TVB仍有官司纠纷，故他无得随TVB一起宣传该剧，但他并不感到可惜：“会理解两间公司嘅立场，唯一希望事件得以尽快解决。自己反而多谢TVB用咗我同坤哥争冲凉条片嚟宣传，好开心，觉得我嘅演出受到认同。”众所周知帮TVB拍剧经常日夜癫倒、有开工无收工以及工作时间超长等等，总之就是出名辛苦的，不过今次BabyJohn却不觉得好辛苦。他说：“因为系电影制作班底，用电影嘅拍摄方法，每日开工12-13个钟，成件事好舒服。我同Kent哥、坤哥同埋王子涵住同一间酒店，我哋日日下昼就一齐饮咖啡，晚晚都一齐食饭，真系好似一家人咁样，拍得好开心。”

提到该剧讲述关于老千的故事，而外界也会有人认为艺人等同伪人，虚伪的言行某程度上都是欺骗观众的，对此BabyJohn却不认同：“唔可以话从事咩职业嘅人就系咩性格，每个人都唔同。我一向待人以真诚，唔钟意呃人，身边啲朋友话我入行至今都无变过，以心待人好重要，我自己付出咗，对得住自己就够。我系用最真嘅一面嚟面对大家，想将自己最赤裸嘅部分分享畀观众，即使我演戏时所演绎出嚟嘅情感都系真嘅。我唔会去谂系咪被人呃又或者会唔会蚀底，但系对我好嘅人我会感受到。”

摄：梁碧玲

outfit：Club Monaco

Hair：Domanic Tao@O4

Venue：李好味

一齐睇下BabyJohn嘅靓相啦。