黄心颖30岁生日开校服派对　马国明超龄学生Look男主人身份现身

细个嘅时候好想快啲长大，唔使再做功课唔使再面对考试。但到真正长大后，好多时都会怀念起校园青葱岁月。眨下眼黄心颖已经入行超过6年，听日（1月23日）就系佢30岁生日，连日来切蛋糕切到手软，呢日仲有一大班圈中好友同佢开校服派对，男友马国明都有出席，企正喺寿星女身边似足男主人呀！

心颖性格爽直，入行以来同佢合作过嘅好多都变成朋友，呢日校服派对阵容相当强劲，高海宁、汤洛雯、麦美恩、朱千雪、赵希洛、岑杏贤、庄思明、杨明、何雁诗、王子涵、张振朗同李霖恩，个个跟足Dress Code着上蓝白色调校服出席。 心颖扎孖辫满场飞不停同大家自拍，一众TVB花旦齐齐变做学生妹，Pose相当青春可人，大家又觉得边个最吸睛呢？

不过一众靓女都唔够寿星女男友马国明抢镜，人人着白色蓝色，马明就着上红色冷衫戴埋幅眼镜，横睇掂睇都成个周星星同学咁，超龄学生㖞！见佢大方企喺心颖旁边成个男主人咁款，难怪寿星女笑得咁甜啦。心颖上载大合照话：“多谢校友for throwing this birthday party for me! 好多校花校草呀！ many more pix to come.”唔知生日正日，马明又准备咗咩惊喜俾佢呢？