张继聪谢安琪结婚12周年恩爱如昔　Kay性感撑台脚庆祝皮革婚

撰文： 洪晓璇
出版：更新：

结婚从来都唔系恋爱嘅终点，而系人生新一章嘅开始。由两个人变成一个家，要磨合生活习惯，要接受对方嘅家庭及生活圈子，每一日每一步都系学问。眨下眼张继聪同谢安琪已经结婚12年，虽然平时两公婆都系分享仔女可爱生活照居多，但其实佢地都有为对方留下最重要嘅位置，结婚纪念日阿聪仲好识做悉心安排，男士们学嘢啦﹗

再强嘅女人都希望可以有个人爱钖保护自己，谢安琪喺张继聪面前就可以放心做小鸟伊人啦。（张继聪IG）

12年嘅结婚周年又名皮革婚，喻意佢地嘅感情已经好似皮革一样咁坚韧，经得起风浪。好多人拍拖结婚耐咗，都会懒得送惊喜。结婚12周年阿聪无买咩名贵珠宝甚至送层楼俾老婆，不过就好有心思咁订制一对水杯，柄就刻有佢同老婆英文名Kay及Louis，永远成双成对。

水杯虽然唔系名贵礼物，但会专诚去订制刻名，呢份心思已经系无价。（张继聪IG）

张生张太亦难得放低2个小朋友出去撑台脚，Kay难得性感著上黑色吊带低胸裙，同老公头贴头合照。台上一个精致嘅蓝莓芝士蛋糕，碟上写住Happy Anniversary，洋溢幸福温馨感觉。阿聪上载靓相并引用美国作家Mignon McLaughlin金句：“A successful marriage requires falling in love many times ,always with the same person. （一段成功嘅婚姻要不断堕入爱河，而且要系要同一个人）”作为女人又点可能唔冧到晕呢﹗

难得同老公撑台脚二人世界，KAY罕有性感，两个人头贴头真系唔使食蛋糕都甜到漏啦﹗（张继聪IG）
+2