【皓镧传】吴谨言、聂远再续前情　于正为历史原型狂洗白

由聂远同吴谨言主演嘅《皓镧传》日前终于喺内地播出，剧集以战国晚期为背景，描述赵国御史之女李皓镧（吴谨言饰）因被姐姐陷害而被逐出家门，继而被商人吕不韦（聂远饰）买下，并献畀喺赵国做人质嘅秦王孙（茅子俊饰），三人之间既有情又有义，最后变为三角恋。

吴谨言饰演嘅李皓镧，其实正正就系赵姬，亦即系秦始皇嬴政嘅生母。有关赵姬嘅历史记载，离不开“生性淫荡、包养男宠、误国误民”。据《史记。吕不韦列传》所记载，吕不韦发现嫪毐原来系“大阴人”（阳具巨大的人）后，随即安排佢以太监身份入宫服待／取悦赵姬所以赵姬对呢份厚礼珍而重之，最后仲连仔都生埋……（如果有睇过TVB嘅《寻秦记》，相信都会记得江华饰演嘅嫪毐）

不过，《皓镧传》开播后，唔少网民都觉得吴谨言饰演嘅皓镧既正气又倔强（例如系佢被逐出家门后，喺落难时为救下人之母而变卖仅有嘅饰物），同赵姬嘅性格差距甚远，认为制作人于正篡改历史同时，并为赵姬洗白。其实于正向来都有为历史人物洗白嘅习惯，就好似《陆贞传奇》，赵丽颖饰演嘅陆贞既刻苦又善良，但历史上记载嘅陆贞却系灭国妖女。而今次嘅《皓镧传》，本为有私情嘅吕不韦同赵姬，则变成有情有义嘅一对。不过，《皓镧传》全长62集，依家先播咗10集，话唔定之后会有逆转。